25 апрель куни Ўзбекистон Республикаси ва Беларусь Республикаси ҳукумат раҳбарлари ўртасида кенгайтирилган таркибдаги музокаралар ўтказилди. Музокаралар Ўзбекистон Республикаси Бош вазири Абдулла Арипов ҳамда Беларусь Республикаси бош вазири Роман Головченко томонидан олиб борилди.

Учрашув давомида Инновацион ривожланиш вазири Иброҳим Абдураҳмонов Ўзбекистон ва Беларусь ўртасидаги илм-фан ва технологиялар соҳасида амалга оширилаётган ишлар ҳақида маълумот берди. Вазир Ўзбекистон–Беларус қўшма илмий лойиҳалар танловлари доирасида амалга оширилган 15 та лойиҳалар якунига етказилиб, ҳозирда тижоратлаштириш босқичидан ўтаётганини таъкидлади. Шунингдек, қўшма танловларнинг 2-тури доирасида жами 2 млн. АҚШ доллари қийматидаги 30 та илмий лойиҳа молиялаштирилганини айтиб ўтди. Бундан ташқари, сўнгги 3 йил давомида 200 нафар ёш олимлар ва тадқиқотчиларнинг Беларусь илмий-тадқиқот институтларига стажировкаларини ташкил этишга муваффақ бўлинди.

Музокаралар доирасида Ўзбекистон Республикаси Инновацион ривожланиш вазирлиги ҳамда Беларусь Миллий фанлар академияси ўртасида меморандум ҳамда 2022–2023 йиллар учун илмий-техник ва инновацион ҳамкорлик дастури имзоланди. 

Икки давлат ўртасидаги илмий-техник ва инновацион ҳамкорлик дастури доирасида томонлар қўшма илмий лойиҳаларни қўллаб қувватлашни давом эттириш, илмий тадбирларни ташкил этиш, олимларнинг малакасини ошириш, илмий инфратузилмани ривожлантириш ва технологиялар трансферини амалга ошишга келишдилар. Беларусь Миллий академияси билан меморандум доирасида эса икки давлат илмий жамоаларининг турли шакллардаги ҳамкорлигини кенгайтириш, олимлар ва тадқиқотчиларнинг ўзаро алмашинувини йўлга қўйиш, илмий маълумотлар билан алмашиш, ҳамкорликда нашрий фаолиятни ривожлантириш, илмий-амалий тадбирларни қўллаб қувватлаш кўзда тутилган.

Таъкидлаш жоизки, Ўзбекистон ва Беларусь билан илмий ҳамкорлик доирасида Тошкент темир йўллар транспорти муҳандислари институти ҳамда Тошкент Техник университети базасида иккита қўшма илмий лабораториялар ташкил этилган. Ўнлаб ўзбек олимлари Беларусь Миллий Фанлар академияси институтларида тадқиқот ишларини олиб бормоқдалар. Шунингдек, Инновацион ривожланиш вазирлиги ҳузуридаги «Яшнабод» ва Беларусь Миллий техник университетининг «Политехник» технопарки ўртасида ҳамкорлик ўрнатилган бўлиб, қўшма стартап лойиҳаларни ривожлантириш назарда тутилган.

Ўзбекистон ва Беларусь ўртасидаги илм-фан ва технологиялар соҳаларидаги ҳужжатлар икки давлат илмий ҳамкорлигининг янада мустаҳкамланишига, ўзаро манфаатли лойиҳаларни амалга оширишга хизмат қилади.