Президентнинг «Ташқи савдо фаолияти иштирокчиларини қўллаб- қувватлашнинг қўшимча чора-тадбирлари тўғрисида»ги фармони қабул қилинди. Ҳужжат матни ЎзАда эълон қилинди.

Унга кўра, 2023 йил 1 апрелга қадар маҳаллий корхоналарга юқори қўшилган қийматли маҳсулотларни экспорт қилишда ташиш харажатларини 70 фоизгача миқдорда компенсация қилишга субсидиялар тақдим этилади. Бунинг учун товарлар Европа Иттифоқи давлатларига сотилиши керак.

Шунингдек, қўшни давлатларга экспорт қилинган юқори қўшилган қийматга эга маҳсулотларни сотишда ташиш харажатларини 50 фоизгача миқдорда компенсация қилинади.

Шу билан бирга, «Божхона омбори» режимида олти ойдан кўп бўлган товарларнинг божхона расмийлаштирувида тўловлар бўйича имтиёзларни қўллашни тақиқловчи тартиб бекор қилинади.