Кеча, 29 март куни Фавқулодда вазиятлар вазирлигининг Шаҳрисабз “Темурбеклар мактаби” ҳарбий-академик лицейида “Миллий қадриятлар ва ватанпарварлик тарбияси” мавзусида илмий-амалий анжуман ташкил қилинди. Унда Республикамиздаги мавжуд барча “Темурбеклар мактаби” ҳарбий-академик лицейларининг ўқитувчи ва ўқувчилари онлайн ва офлайн тарзда иштирок этди.

Анжуманни Республика Маънавият ва маърифат маркази раҳбари Минҳожиддин Ҳожиматов онлайн тарзда кириш сўзи билан очиб, ёш авлод тарбиясида миллий қадриятлар ва ватанпарварлик тарбиясининг аҳамияти хусусида маъруза қилди. Шунингдек, илмий-амалий анжуман давомида “Темурийлар даври адабиёти ва санъати”, “Амир Темурнинг Олтин Ўрда давлатига ҳарбий юриш сабаблари ва натижалари”, “Маънавиятни юксалтиришда миллий анъана ва қадриятларимизнинг ўрни” ҳамда “Аждодларимизга муносиб авлод бўлайлик!” сингари мавзуларда маърузалар тингланди.

Анжуманнинг амалий қисми ҳарбий-академик лицейда ташкил қилинган ҳунармандчилик, расмлар кўргазмаси, мақом, чанқовуз ҳамда бахшичилик намуналари, дуторчи қизлар ансамбли, фольклор жамоалари чиқишлари, миллий спорт ўйинлари, миллий либослар ва баҳорий таомлар кўргазмалари иштирокчиларда катта қизиқиш уйғотди. Шунингдек, ватанпарварлик кўргазмалари, жумладан, қўл жанги, саф майдони асбоб-анжомлар кўргазмаси, улуғ алломалар сиймоси гавдалантирилган саҳна кўринишлари намойиш этилди.