Халқ депутатлари Тошкент шаҳар Кенгаши ҳузуридаги Жамоат фонди 2022 йил учун «Ҳеч ким меҳр ва эътибордан четда қолмайди» мавзусидаги Давлат грантининг 1-танловини эълон қилди.

Танловда давлат рўйхатидан ўтган Тошкент шаҳри ННТлари ва фуқаролик жамияти бошқа институтларининг қуйидаги йўналишлардаги лойиҳалари кўриб чиқиш учун қабул қилинади:

Имконияти чекланган ёшлар ва хотин-қизларнинг ҳуқуқий саводхонлигини ошириш, уларни касб-ҳунарга йўналтириш ҳамда бандлигини таъминлашда нодавлат нотижорат ташкилотларнинг фаоллигини ошириш;

Маҳаллалардаги ўзгалар парваришига муҳтож имконияти чекланган ёлғиз кексаларга, турли хасталикка чалинган бемор болалар ва ёшларга ўз уйида ижтимоий ва ҳуқуқий ёрдам кўрсатиш;

Имконияти чекланган шахсларда тадбиркорлик кўникмаларини шакллантириш ва ўз бизнесини бошлашига кўмаклашиш, давлат ва нодавлат ташкилотлари ўртасида ижтимоий шериклик асосида оилавий тадбиркорликни ривожлантириш учун бошланғич сармоя микрокредитларини олишда амалий ёрдам кўрсатиш;

Кексалар, имконияти чекланган, якка-ёлғиз ва оғир аҳволга тушиб қолган инсонларни қўллаб-қувватлаш, уларга меҳр ва мурувват кўрсатишда давлат органларига кўмаклашиш;

Маҳаллаларда имконияти чекланган ёшларни жисмоний тарбия ва спорт билан шуғулланишларига шарт-шароитлар яратиш, соғлом турмуш тарзини қарор топтиришга кўмаклашиш;

Имконияти чекланган, ёрдамга муҳтож ва оғир ижтимоий аҳволга тушиб қолган хотин-қизларга ижтимоий-психологик ёрдам кўрсатиш;

Маҳаллаларда, малакали мутахассисларни жалб этган ҳолда имконияти чекланган кичик ёшдаги болалар ва уларнинг оналари учун тиббий кўрикларни ташкил этиш;

Ривожланишида муаммолари бўлган ёки уларнинг юзага келиши хавфи бўлган болаларни парваришлаш ва уларни ривожлантириш учун ота-оналар учун зарурий билим, малака кўникмаларини бериш;

Тизимли ёндашув асосида инклюзив таълим ва тарбия жараёнига жалб этилган болаларга нисбатан дискриминация ва стигматизация ҳолатларини бартараф этишга қаратилган фаолиятни олиб бориш;

Таълим, тарбия муассасаларида алоҳида эҳтиёжга эга бўлган болалар, ёшлар, хотин-қизлар учун ижобий, соғлом психологик муҳитни яратишга доир амалий ишларни ташкил этиш.

Битта лойиҳа учун ажратиладиган маблағ миқдори – 40 000 000 сўмгача. Лойиҳалар ижро муддати 1 йилгача муддатда бўлиши лозим. Ҳужжатлар 2022 йилнинг 16 мартидан 16 апрелгача қабул қилинади.

Танловларда қатнашиш учун қуйидаги ҳужжатлар тақдим этилиши сўралади:

Ташкилот раҳбари томонидан имзоланган ва муҳр билан тасдиқланган кузатув хати;

Халқ депутатлари Тошкент шаҳар Кенгаши ҳузуридаги Жамоат фондининг телеграм каналида жойлаштирилган шаклда тўлдирилган давлат гранти лойиҳаси учун ариза;

Охирги ўзгартиш ва қўшимчалар билан давлат рўйхатидан ўтган ННТлар ва фуқаролик жамияти бошқа институтларининг Устави (Низоми) нусхаси;

Ташкилотнинг давлат рўйхатидан ўтганлиги тўғрисидаги гувоҳнома (нусхаси);

Агар лойиҳани амалга ошириш лицензияланадиган фаолиятни талаб қилса, унда лицензиянинг нусхаси;

Манфаатдор давлат ва жамоат ташкилотларининг тавсия ҳамда қўллаб-қувватлаш хатлари (имкон қадар).

Танлов бўйича ҳужжатлар муҳрланган конвертда (А4 форматда): Тошкент шаҳри, 100066. Ислом Каримов кўчаси, 51-уй манзилида жойлашган Тошкент шаҳар ҳокимлигининг 2-қавати 206 хонада жойлашган Халқ депутатлари Тошкент шаҳар Кенгаши ҳузуридаги ННТ ва фуқаролик жамияти бошқа институтларини қўллаб-қувватлаш Жамоат фонди номига юборилиши керак.

Шунингдек, танлов шартлари ва тақдим этилиши керак бўлган маълумотлар билан Халқ депутатлари Тошкент шаҳар Кенгаши ҳузуридаги ННТлар ва фуқаролик жамиятининг бошқа институтларини қўллаб-қувватлаш Жамоат Фондининг «Тошкент шаҳар Жамоат фонди» канали ва ижтимоий тармоқлар орқали танишиш ва 97-775-50-51 рақамига боғланиш мумкин.