Ўзбекистон Республикаси Фанлар академияси академиги Беҳзод Юлдашев илмий раҳбарлигидаги ўзбек физик-олимлар гуруҳи жаҳонда илк бор янги элементар заррача мавжудлигини экспериментал тарзда кўрсатишди. Бу ҳақида Ўзбекистон Фанлар академияси ахборот хизмати хабар берди.

Қайд этилишича, Бир нуклонга 3.4 ГеВ энергияли карбон ядроларининг карбон ядролари билан тўқнашувларининг таҳлили натижасида иккита протон ва битта пи-мезондан иборат саккиз кваркли тизимда янги резонанс заррача топилган.

Кашф этилган қисқа яшовчи заррачанинг массаси 2118 ± 1 МеВ/c2 га тенг бўлиб, унинг яшаш даври кучли ўзаро таъсир вақтига қараганда нисбатан катта бўлиши кўрсатилди (янги резонанс заррачанинг кенглиги 4 МеВ/c2 дан ошмайди).   

Кузатилган резонанс структуранинг фон тақсимотидан экспериментал ошиши 122 ± 20 ҳодисани ёки 4.5 стандарт хатоликни (сигмани) ташкил этган.

Янги резонанс заррача тўғрисида олинган натижалар муаллифлар томонидан World Scientific ҳалқаро нашриёт компаниясининг Web of Science ҳамда Scopus базаларида индексацияланган нуфузли International Journal Of Modern Physics E (Nuclear Physics) номидаги илмий журналда чоп этилган.

Ҳозирда мақола муаллифлари янги заррача кузатилиши мумкин бўлган ядровий тўқнашувларга оид бошқа экспериментал маълумотларни таҳлил қилишмоқда.