Бугун, 7 март куни Ўзбекистон Ёзувчилар уюшмасида “Аёлга эҳтиром” республика танлови ғолибларини тақдирлаш, фаол ижодкорларга уюшманинг аъзолик гувоҳномаларини топшириш маросими ва мушоира кечаси бўлиб ўтди.

Ёзувчилар уюшмаси ҳайъат аъзолари жами 68 нафар муаллифнинг танловга келиб тушган 124 та асарини кўриб чиқди. Ҳаётимиз қувончи, оилаларимиз кўрки бўлган мўътабар она сиймоси юксак даражада тараннум этилган, бугун жамиятимизда амалга оширилаётган янгиланишлар ва бунёдкорлик ишларида фидойилик кўрсатиб, салмоқли натижаларга эришаётган хотин-қизларга бағишланган шеърий, насрий ҳамда бадиий-публицистик асарлар сараланиб, холисона баҳоланди.

“Аёлга эҳтиром” танловининг 1-, 2-, 3-даражали ҳамда рағбатлантирувчи ўринларига Ёзувчилар уюшмасининг диплом ва эсдалик совғалари топширилди. Шунингдек, ушбу тадбирда 14 нафар фаол ижодкорга, жумладан, Oyina.uz мухбири Феруза Хайруллаевага ҳам Ёзувчилар уюшмасининг аъзолик гувоҳномаси топширилди.

“Аёлга эҳтиром” республика танлови ғолиблари рўйхати:

1-ўрин

1. Маҳмуд Тоир – “Мен офтобга алишмаган аёллар” шеърий тўплами учун.

2-ўрин:

1. Гавҳар Ибодуллаева – “Аёл – мўъжиза ёхуд Ватаннинг бошланиши” номли китоби

учун.

2. Гулжаҳон Мардонова – “Қуёшим-энам” китоби учун.

3-ўрин:

1. Зарифа Эралиева – “Қуёшингни асра, осмон” ҳужжатли эссеси учун.

2. Муҳаббат Йўлдошева – “Қайнона” ҳикоялар тўплами учун.

3. Ривож Ўтарбоев – “Улуғлар ичида улуғсан аёл” шеърий туркуми учун.

Рағбатлантирувчи мукофотлар:

1. Юлдуз Ўрмонова – “Мактублар” шеърий туркуми учун.

2. Гўзал Охунова – матбуотда эълон қилинган насрий ва публицистик асарлари учун.

3. Мўтабар Бойматова – “Нодираи даврон” шеърий драмаси учун.

Тадбир мушоира билан давом этди.