Украинадан Польшага эвакуация қилинган яна 258 нафар Ўзбекистон фуқароси мамлакатимизга олиб келинди. Бу ҳақида Ташқи ишлар вазирлиги расмий вакили хабар берган.

Таъкидланишича, Польшанинг Катовице шаҳридан ҳамюртларимизни олиб келган иккинчи махсус самолёт 1 март куни соат 9:15 да пойтахт Тошкентга келиб қўнган.

Айни пайтгача Украинадан жами 509 нафар Ўзбекистон фуқароси ватанга қайтарилди. 
Қайд этилишича, ҳозир "Карчова" назорат-ўтиш пунктидаги тўпланиш жойида бўлиб турган 650 дан зиёд фуқароларимиз учун барча зарур шароит яратилган. Уларни олиб келиш учун яна қатор эвакуацион рейслар ташкил этиш кўзда тутилмоқда.

Ўзбекистоннинг Польшадаги элчихонаси ходимлари фуқароларнинг аэропортда бўлиб туришларини мувофиқлаштирмоқда. Элчихонада узлуксиз ишлайдиган тезкор штаб ташкил этилган.