Қорақалпоғистоннинг Беруний туманида 23 февраль куни ноқонуний буғу овлаган шахслар ушланди. Бу ҳақида Қорақалпоғистон Экология қўмитаси хабар қилди.

Қайд этилишича, шу куни чамаси соат 04:30 да «Бийбозор» овули ҳудудидаги ўрмон хўжалигига ёндош жойда милтиқнинг отилган овози ҳақида резерват ходимларига хабар келиб тушган. Ходимлар милтиқ овози чиққан тахминий жойга етиб борган. Атрофни кўздан кечириш жараёнида шу ердаги ички асфальт йўлида қон изларини кўрган. Шунингдек, улар фермер хўжалигига тегишли буғдой даласининг ёнидаги ариқда тузоқ изларини ҳам аниқлаган. Инспекторлар қон излари бўйлаб асфальтда 4 км ва тупроқ йўлда мототцикл изи билан тахминан 2 км атрофида йўл юрган.

Изланиш натижасида резерват ходимлар фермер хўжалиги даласи ёнидаги ариқ ичида бир дона Бухоро буғусининг сўйилган боши, оёқлари, териси ва ички аъзоларини аниқлаган. Ҳолат бўйича Орол табиатни муҳофаза қилиш прокуратураси ва Беруний тумани ИИБга хабар қилинган.

Ходимлар мототцикл изи билан бориб, транспорт воситаси изи бориб тўхтаган уйни аниқлаган. Уйда давлат рақами йўқ қизил рангли мототцикли тургани ва бу мототцикл ушбу хонадонда яшовчи А.Ш.га тегишли экани маълум бўлган. Мототцикл кўздан кечирилганда яхшилаб ювилгани, лекин баъзи жойларида қон доғлари ва ҳайвон жунлари борлиги аниқланган.

Тергов давомида Ш.А. ҳақиқатан ҳам шу куни бир дона Бухоро буғусини отганини тан олган ва уйидан бир дона ҳужжатсиз ов милтиғини ҳамда бир жуфт Бухоро буғуси шохини олиб чиқиб берган.

У сўроқ давомида қонунбузарликни шериги, «Олтинсой» овулида яшовчи К.М. (1996 йилда туғилган) билан бирга содир этганини тан олган. К.М. сўроқ қилинганда Ш.А. берган кўрсатмаларни тўлиқлигича тасдиқлаган.

Ҳолат бўйича Орол табиатни муҳофаза қилиш қилиш прокуратураси томонидан Ш.А. ва К.М.га нисбатан тўпланган материаллар процессуал тартибда расмийлаштирилиб, қонунчиликда белгиланган тартибда ҳуқуқий баҳо бериш учун олиб кетилган. Ҳозирда ўрганиш ишлари олиб борилмоқда.