Ўзбекистонда 2022 йил 1 январдан амалиётга жорий этилган кешбек тизими орқали 86,7 минг нафар истеъмолчига 15,1 миллиард сўм кешбек тўлаб берилди. Бу ҳақида Давлат солиқ қўмитаси хабар қилди.

Қайд этилишича, ўтган ой мобайнида 276 минг 302 та харид чекига ҳисобланган яна 5,4 миллиард сўмдан ортиқ кешбек тўланмаган. Бунга 17 минг 517 та тадбиркорлик субъектларининг солиқ ҳисоботларидаги камчиликлар сабаб бўлган:

• 2 минг 763 та тадбиркор (ҳисобланган кешбек 2,6 миллиард сўм) ҳисоботларида чек маълумотлари тўлиқ акс эттирилмаган;
• 12 минг 406 та тадбиркор (ҳисобланган кешбек 1,4 миллиард сўм) умуман ҳисобот топширмаган;
• 2 минг 348 та тадбиркорнинг 1 миллион сўмдан юқори солиқ қарзи мавжуд (ҳисобланган кешбек 1,4 миллиард сўм).

«Тадбиркорлик субъектлари томонидан солиқ ҳисоботлари топширилиши, камчиликлар тузатилиши ҳамда уларнинг қарздорлиги камайиши бўйича кунлик ўзгаришлар реал вақт режимида инобатга олиниб, ҳисобланган кешбек суммаси тасдиқланади», дейилади хабарда.