Украинадаги вазият кескинлашгани ва фавқулодда ҳолат жорий этилгани сабаб Ўзбекистоннинг Киевдаги элчихонаси фуқароларга мурожаат қилди.

Маълум қилинишича, ҳозирда Ўзбекистон Республикасининг Киевдаги элчихонаси томонидан эвакуация режаси ва Украина ҳудудини тарк этишни хоҳловчи фуқаролар рўйхати ишлаб чиқилмоқда.

Украина ҳаво ҳудудининг ёпилишини инобатга олган ҳолда жўнаб кетиш йўналишлари ва жўнаб кетиш жойи ишлаб чиқилмоқда. Мақбул эвакуация йўналишлари бўйича масалалар учинчи давлатларнинг манфаатдор хизматлари билан келишилгач, Ўзбекистон фуқаролари Элчихонанинг www.uzbekistan.org.ua сайти ва ижтимоий тармоқлардаги каналларида қўшимча равишда хабардор қилинади.

«Украинадан чиқиб кетишни хоҳловчи Ўзбекистон Республикасининг барча фуқаролари паспорт маълумотларини Элчихонанинг embassy@uzbekistan.org.ua электрон манзилига юборишлари сўралади», дейилади хабарда.

Украинада бўлган Ўзбекистон Республикаси фуқароларидан тинчлик сақлашлари ва қўшимча саволлар туғилганда Элчихона билан алоқада бўлишлари сўралган.