YouTube ва TikTok фойдаланувчиларнинг шахсий маълумотларини бошқа ижтимоий тармоқ иловаларига қараганда кўпроқ кузатиши аниқланди. YouTube шахсий маълумотларни асосан ўз мақсадлари учун тўплайди. TikTok эса учинчи томонга буни амалга оширишга имкон беради.

URL Genius платформаси тадқиқотига кўра, Googleга тегишли бўлган YouTube қидирув тарихи ва жойлашувини кузатиш учун фойдаланувчи маълумотларини тўплайди. Бу фойдаланувчиларга мос рекламаларни кўрсатиш учун керак.

Хитойнинг ByteDance технология гигантига тегишли TikTok учинчи томонга шахсий маълумотларни тўплаш имконини беради. Учинчи томон кузатаётганда маълумотларни айнан ким кузатиб бораётганини ёки улар қандай маълумотларни тўплашини билиш деярли иложсиз. Тўпланаётган маълумотлар орасида фойдаланувчи ташриф буюрган хабарлар, унинг жойлашган жойи ёки бошқа шахсий маълумотлари бўлиши мумкин.

Учинчи томон фойдаланувчи дастурдан чиққандан кейин ҳам бошқа сайтлардаги фаолиятини кузатиши мумкин. URL Genius 10 та ижтимоий тармоқ иловалари — YouTube, TikTok, Twitter, Telegram, LinkedIn, Instagram, Facebook, Snapchat, Messenger ва Whatsapp бўйлаб қанча домен фойдаланувчи фаоллигини кузатишини билиш учун Apple iOSнинг Record App Activity функциясидан фойдаланган.

«YouTube ва TikTokнинг ҳар бирида 14 тадан контакт тармоғи топилган, бу бошқа иловаларга қараганда анча кўпдир. Бошқа иловаларда эса ўртача олтита алоқа тармоғи мавжуд эди. Тадқиқот шуни кўрсатадики, ушбу иловаларга ўз аккаунти орқали кирганда кўрсаткич юқори бўлиши мумкин», дейилади хабарда.

YouTube кузатувчиларининг ўнтаси маҳаллий тармоқ контактлари бўлган, яъни платформа ўз мақсадлари учун фойдаланувчи фаолиятини кузатган. Тўртта контакт учинчи томон доменларига тегишли эди, шунинг учун платформа уларга маълумот тўплаш ва фойдаланувчи фаолиятини кузатиш имконини берган.

TikTokда эса 14 та контакт тармоғидан 13 таси учинчи шахсларга тегишли эди. Тадқиқотчиларнинг қайд этишича, фойдаланувчи илова созламаларида кузатишга рухсат бермаган тақдирда ҳам учинчи томон кузатуви давом этган.