Таниқли археолог, академик, тарих фанлари доктори, профессор Эдвард Васильевич Ртвеладзе 80 ёшида оламдан ўтди.

Олим 1967 йили ТошДУни тугатган. 1967 йилдан Ўзбекистон санъатшунослик институтида илмий ходим сифатида ўз фаолиятини бошлаган.

У Ўрта Осиё, Кавказ, Кипр, Япония ва Францияда олиб борилган 80 дан ортиқ илмий археологик экспедициялар иштирокчиси. Кўпгина археологик ёдгорликларни очган ва текширган. Унинг раҳбарлигида Тоҳаристон экспедицияси томонидан олиб борилган қазишлар натижасида археологик амалиётда 1 марта Кушонлар даврига оид қадимий шаҳар харобаси тўлиқ очилган.

Шунингдек, унинг раҳбарлиги остида шаҳарлар ва таниқли давлат арбоблари юбилейларига бағишланган коллектив монографиялар, шу жумладан, «Амир Темур жаҳон тарихида», «Хива — минг гумбазли шаҳар», «Шаҳрисабз», «Термиз», «Жалолиддин Мангуберди» ва бошқалар тайёрланган. 1985 йили Беруний номидаги Ўзбекистон Давлат мукофоти лауреати бўлган. 2001 йилда эса «Буюк хизматлари учун», 2003 йилда «Меҳнат шуҳрати» орденлари ва Грузиянинг «Гирсебис» («Рицарлик шарафи») ордени билан мукофотланган.

Олимни кўпчилик Ўзбекистон Республикаси Фанлар академияси Санъатшунослик институтининг катта олими, тарих фанлари доктори, ЎзРФА академиги, Ўзбекистон маданий меросини ўрганиш, сақлаш ва оммалаштириш бўйича Бутунжаҳон жамиятининг илмий кенгаши раиси сифатида танийди.

Унинг ўзбек илм-фанига қўшган ҳиссаси беқиёсдир. Инновацион ривожланиш вазирлиги олимнинг оиласи, яқинлари ва шогирдларига ҳамдардлик билдиради.