Ўтган йили Таълим сифатини назорат қилиш давлат инспекцияси ҳамда Финляндия миллий таълим агентлиги ўртасида ўзаро ҳамкорлик меморандуми имзоланган. Финляндия ҳукумати томонидан ушбу ҳамкорлик меморандумида кўзда тутилган вазифаларни амалга оширишни қўллаб-қувватлаш мақсадида 1 миллион евро миқдорида маблағ ажратилди.

Шунингдек мазкур лойиҳа режасини ишлаб чиқиш ва Ўзбекистон томони билан келишиш учун эса қўшимча 55 000 евро маблағ ажратилган бўлиб, унда фин таълим тизими вакилларидан иборат делегация Ўзбекистонга ташриф буюриши, таълим жараёнлари билан яқиндан танишган ҳолда Таълим инспекцияси вакиллари билан муҳокамалар ўтказиш орқали лойиҳа режасини ишлаб чиқиши кўзда тутилган.

Дастлабки келишувларга кўра лойиҳа доирасида фин таълим экспертларини жалб қилган ҳолда ўқув жараёнларини ташкил қилиш, ўқув-методик адабиётлар яратиш, таълим вакиллари учун малака ошириш курслари фаолияти кўзда тутилган.

Таълим йўналишидаги яқин ҳамкорликнинг давоми сифатида келгусида финляндиялик ва эстониялик ҳамкорлар кўмагида Ўзбекистон таълим тизимининг халқаро таълим ҳамжамиятига қўшилишига қаратилган TWINNING дастурини амалга ошириш бўйича музокаралар олиб бориляпти.

Маълумот учун, TWINNING яъни «биродарлик» лойиҳаси Европа Иттифоқи қонунчилиги учун зарур кўникма ва тажрибага эга бўлган институционал ҳамкорлик орқали шерик мамлакатларни қўллаб-қувватлашга қаратилган узоқ муддатли лойиҳа ҳисобланади.

Ушбу лойиҳанинг асосий мақсади кадрлар тайёрлаш ва давлат институтлари тузилмаларини қайта ташкил этишни қўллаб-қувватлаш орқали шерик давлатлар маъмуриятларининг бошқарув салоҳиятини оширишга қаратилган.