Кеча, 3 февраль куни Ўзбекистон Ёзувчилар уюшмасида янги таркибдаги Таржима ижодий кенгашининг йиғилиши бўлиб ўтди. Йиғилишни уюшма раисининг ижодий ишлар бўйича биринчи ўринбосари Нодир Жонузоқ олиб борди.

Унда Таржима кенгашининг 2022 йилда бажариши кўзда тутилган вазифалари муҳокама этилди. Таржима кенгашига адабиётшунос олим Зуҳриддин Исомиддинов раис қилиб тайинланди. Кенгаш аъзолари сафига Адҳамбек Алимбеков, Ҳумоюн Акбар, Бегойим Холбекова, Нодира Иброҳимова, Гулноз Мамарасулова қабул қилинди.

Йиғилишда жорий йилда нашр этилиши назарда тутилган “Туркий адабиёт хазинасидан” 100 жилдлик асарлар мажмуаси устидаги ишларни жадаллаштириш масаласи ҳам кўриб чиқилди. Мажмуани тайёрлаш бўйича ишчи гуруҳ аъзолари Бобохон Муҳаммад Шариф, Баҳодир Карим, Турсинали Аҳмедов, Адҳамбек Алимбеков мажмуага киритиладиган таржималарнинг савияси юксак бўлишига алоҳида эътибор берилишини таъкидлади.

100 жилдликка илгари нашр этилган энг яхши таржималар ҳам танлаб олинган. Улар орасида Ғафур Ғулом, Миртемир, Илёс Муслим, Мирзакалон Исмоилий, Шоислом Шомуҳамедов, Миад Ҳакимов, Турсунбой Адашбоев, Усмон Қўчқор, Файзи Шоҳисмоил каби устоз ижодкорларнинг таржималари бор.