Кинематография агентлиги буюртмасига асосан "Ёшлик" киностудияси томонидан суратга олинган «Баҳс» қисқа метражли фильми Японияда бўлиб ўтган ISCA халқаро фестивалининг Гран-при мукофотини қўлга киритди.

Фильм аҳмоқона тортишув ҳақида ҳикоя қилади. Баъзида инсонлар ҳақлигини исботлашга уриниб, ўз яқинларини қандай хафа қилиб қўйганликларини билмай қоладилар. Эришилган бугунги ғалаба ҳаёт сарҳисоб қилинганидан кейин ўз қийматини йўқотади. Фильмнинг асосий ғояси шундаки, яқин инсонлар шубҳали ғалабалардан кўра муҳимроқдир.

«Баҳс» драмасида бош ролларни Ўлмасжон Сориев, Мадина Одилова, Маҳмуд Исмоилов, Малика Ибрагимова, Азамат Хасанбоев, Шуҳрат Хўжаев ижро этишган. Сценарий муаллифи ва режиссёр Гулнора Иванова, оператор Абдулазиз Асатуллаев, постановкачи рассом Беҳзод Алимардонов, бастакор Марат Шункар, гример Мавжуда Ёқубова, картина директори Шариф Қосимбоев.