Оилавий муҳитга яқин шаклдаги янги ижтимоий хизматлар кўрсатилади. Бу ҳақда Адлия вазирлиги маълум қилди.

“Руҳий ҳолати бузилган ногиронлиги бўлган шахсларга ижтимоий хизмат кўрсатиш тизимини тубдан такомиллаштириш бўйича қўшимча чора-тадбирлар тўғрисида”ги Президент Фармони билан мўътадил, оғир ва чуқур даражадаги ақлий заифлик ёки деменция ташхиси қўйилган I ва II гуруҳ ногиронлиги бўлган шахслар учун оилавий муҳитга яқин шаклдаги қуйидаги:

- 2026 йил 1 июнгача “Янги кун” кундузги қатнов асосида қараб туриш;

- 2026 йил 1 сентябргача уй шароитида қараб туриш;

- 2026 йил 1 октябргача кичик ҳажмли “Мадад” уйи;

- 2026 йил 1 ноябрга қадар “Ижтимоий таътил” қисқа муддатли жойлаштириш каби янги ижтимоий хизматларни кўрсатиш босқичма-босқич жорий этилади.

Ушбу хизмат кичик ҳажмли “Мадад” уйларида ташкил қилиниб, ижтимоий реестрга киритилган руҳий ҳолати бузилган I ва II гуруҳ ногиронлиги бўлган шахсларга уларнинг қонуний вакили билан имзоланадиган шартномага мувофиқ 1 йилда 1 маротаба шартномада белгиланган муддатда, бироқ кўпи билан 2 ҳафта давомида кўрсатилади.

2026 йил 1 июндан туман (шаҳар) ҳокимликлари ҳузуридаги васийлик ва ҳомийлик бўйича комиссиялар таркибига “Инсон” марказлари ходимлари киритилади.

2026 йил 1 июндан руҳий ҳолати бузилган шахсларга васий ёки ҳомий сифатида тайинланган шахсларнинг васийлик ёки ҳомийликдаги шахслар олдидаги мажбуриятларининг бажарилиши “Инсон” маркази томонидан мониторинг қилиб борилади.