Чет тилларига ихтисослашган ўқув марказларини очишда имтиёз берилган шахслар доираси кенгайтирилади. Бу ҳақда Адлия вазирлиги маълум қилди.

Фармонга кўра, янги ишланмаларга асосланган “спин-офф” корхоналари реестри жорий этилади. Бунда реестрга киритилган ҳамда:

- белгиланган тартибда патентланган илмий тадқиқотлар натижасида яратилган илмий ишланмалар асосида товар ишлаб чиқаришни йўлга қўйган корхоналар ва уларнинг ходимларига 2017 йил 30 июндаги ПФ–5099-сон Фармонда кўзда тутилган имтиёз ва преференциялар татбиқ этилади;

- патентсиз илмий тадқиқот натижасида яратилган илмий ишланмалар асосида товар ишлаб чиқаришни йўлга қўйган корхоналар 2026 йил 1 майдан 2029 йил 1 майгача бўлган давр учун фойда солиғини белгиланган солиқ ставкасидан 50 % пасайтирилган ставкада тўлайди.

2026 йил 1 майдан бошлаб:

- олимлар ва тадбиркорлар томонидан давлат илмий дастурлари доирасида бажарилган фундаментал, амалий ва инновацион лойиҳалар натижасида яратилган ишланмалар бўйича тажриба-синов ишлари учун кетадиган харажатларнинг бир қисми Илм-фанни молиялаштириш ва инновацияларни қўллаб-қувватлаш жамғармаси ҳисобидан қоплаб берилади; 

- хорижий тиллар бўйича камида С1 даражадаги миллий ёки халқаро тан олинган сертификатга эга ёшларга олис ва бориш қийин бўлган ҳудудларда чет тилларига ихтисослашган ўқув марказларини очиш учун 6 ойлик имтиёзли давр билан 3 йил муддатга БҲМнинг 320 бараваригача миқдорда фоизсиз ссуда бериш тартиби 30 ёшдан ошган шахсларга ҳам татбиқ этилади.