Ўзбекистоннинг Буюк Британиядаги элчихонасида нуфузли «Saba Productions» медиа компанияси вакили Фиона Кашли билан бўлиб ўтган учрашувда буюк қомусий олим ва файласуф Абу Али ибн Сино ҳаёти ҳамда илмий меросига бағишланган янги ҳужжатли фильмни суратга олиш масалалари муҳокама қилинди.

Хабарга кўра, бўлажак фильмда тарихий фактларни ўзгартирмасдан, аллома сиймосини асл ҳолича талқин этиш муҳимлиги таъкидланган. Хусусан, улуғ табибни Ғарбда илм-фан ва тиббиёт ривожига улкан таъсир кўрсатган, бутун инсониятга тегишли бўлган Буюк Шарқ олими сифатида намоён этиш зарурлиги айтилган.

Кашлининг сўзларига кўра, ижодий гуруҳ 3–5 апрель кунлари Истанбул шаҳрида суратга олиш ишларини якунлаб, 6 апрель куни Ўзбекистонга етиб келади. Асосий тасвирга тушириш жараёнлари 7–12 апрель кунлари Бухоро вилоятида — аллома туғилиб ўсган заминда бўлиб ўтиши режалаштирилган.

Таъкидланишича, мазкур лойиҳа Ўзбекистоннинг бой тарихий ва интеллектуал меросини халқаро миқёсда тарғиб қилиш, Иккинчи Ренессанс даври вакилларининг жаҳон цивилизациясига қўшган ҳиссасини кенг ёритишга хизмат қилади.