Муҳаммад ал-Хоразмий номидаги ихтисослаштирилган мактаб ўқувчилари Элбек Зоҳиджонов ва Асилбек Суннатов АҚШнинг Massachusetts Institute of Technology (МIТ) университетига 100 фоизлик грант асосида ўқишга қабул қилинди.

Элбек Зоҳиджонов IMO 2025(66-Халқаро математика олимпиадаси)нинг кумуш медали соҳиби бўлиб, Тошкент шаҳридаги Ал-Хоразмий ихтисослаштирилган мактабининг 11-синфида ўқийди.

Асилбек Суннатов эса  IOI 2025(37-Халқаро информатика олимпиадаси)да кумуш медални қўлга киритган. У ҳам Тошкент шаҳридаги Ал-Хоразмий ихтисослаштирилган мактабининг 11-синфида таҳсил олади.

Маълумот учун, 1861-йилда АҚШнинг Кембриж шаҳрида ташкил этилган МIT бугунги кунда дунёнинг биринчи рақамли техник университети ҳисобланади. Олийгоҳ QS жаҳон рейтингида кетма-кет 13 йил давомида 1-ўринни ўзида сақлаб келмоқда (Times Higher Education ва US News рейтингларида эса 2-ўринда).

Университетда жами 11 500 нафар атрофида талаба таҳсил олади. Қабул кўрсаткичи эса бор-йўғи 4 фоизни ташкил этади. Таъкидланишича, бу MIT фақатгина дунёнинг энг ноёб ва иқтидорли ёшларини саралаб олишини англатади.

100 дан ортиқ Нобель мукофоти совриндорларини етиштириб чиқарган университет муҳандислик, компютер технологиялари, математика, физика ва иқтисодиёт йўналишларида мутлақ пешқадам саналади. Айнан, радар, GPS ва бугунги кундаги сунъий интеллект каби йирик кашфиётлар айнан шу ерда яратилган.

Университетнинг молиявий жамғармаси 24 миллиард доллардан ошади ва бу иқтидорли талабаларнинг йирик тадқиқотлар олиб бориши учун чексиз имкониятлар тақдим этади.