Ўзбекистон журналистика ва оммавий коммуникациялар университетида Маҳмудхўжа Беҳбудий таваллудининг 147 йиллиги муносабати билан «Маҳмудхўжа Беҳбудий мероси ва жадид матбуотини ўрганишнинг долзарб масалалари» мавзусида халқаро миқёсдаги илмий-амалий конференция ўтказилди.

Конференция «Маҳмудхўжа Беҳбудий мероси» ва «Жадид матбуотини ўрганишнинг долзарб масалалари» номли сессияларда ўз ишини олиб борди.

Конференцияда Амстердам минтақавий, трансмиллий ва Европа тадқиқотлари мактаби (ERTES), АҚШдаги Ўрта Шарқ тадқиқоти маркази, Канададаги Карлтон университети Европа, Россия ва Евросиё тадқиқотлари институти, Германиянинг Фридрих Шиллер номидаги университети, Туркиянинг Анқара университети, Озарбайжондаги Низомий Ганжавий номидаги Адабиёт институти профессор-ўқитувчилари, тадқиқотчи-мутахассислари қатнашди.

Тадбир сўнггида миллатни уйғонишга, маърифатли бўлишга чорлаган Маҳмудхўжа Беҳбудийнинг ҳаёт йўллари, ижод олами ҳали асрлар давомида келажак авлодга катта ибрат мактаби бўлиб хизмат қилиши таъкидланди.

Маълумот ўрнида, айтиб ўтиш жоизки, давлатимиз раҳбари ташаббуси билан Ўзбекистон журналистика ва оммавий коммуникациялар университети талабалари учун Маҳмудхўжа Беҳбудий номидаги стипендия таъсис этилган.