Ўзбекистонда мактабгача ташкилотлар ва мактаблар учун ўқув дастурларини тўлиқ қайта кўриб чиқиш бошланди. Уларни юқори самарали жаҳон таълим тизимларининг дастурлари ва баҳолаш тизимларига мувофиқлаштириш, шунингдек болаларга келажак учун зарур билим ва кўникмаларни бериш мақсад қилинган. Бу ҳақда Газета нашри хабар берди.

Ислоҳот СмартEд йирик таълим лойиҳасининг бир қисми ҳисобланади. У Ислом тараққиёт банки (ИсДБ), Араб мувофиқлаштириш гуруҳи, Таълим соҳасидаги глобал ҳамкорлик (ГПE) томонидан молиялаштирилади ва Мактабгача ва мактаб таълими вазирлиги (ММТВ), БМТ Болалар жамғармаси (ЮНИСEФ) ҳамда Кембриж университети нашриёти ва имтиҳон маркази билан ҳамкорликда амалга оширилмоқда.

Ислоҳот «янги авлод учун сифатли, ишончли, инклюзив ва замонавий таълим тизимини яратиш»га қаратилган. «Ўқув дастурларини такомиллаштиришда компетенцияга асосланган таълим тамойиллари, гендер тенглиги, инклюзивлик, ижтимоий-эмоционал ривожланиш, шунингдек, иқлим ўзгариши ва экологик масъулият ҳамда технологик ва рақамли саводхонликни ривожлантириш масалаларига алоҳида эътибор берилмоқда», – деди Республика таълим маркази директори вазифасини бажарувчи Дилшода Норбоева.

«Ўзбекистондаги таълим тизими келажаги – адолатли, ишончли ва халқаро миқёсда тан олинган имтиҳонлар билан баҳоланадиган жаҳон андозаларидаги ўқув дастури ҳамда яхши тайёргарликка эга, юқори малакали ўқитувчилар томонидан олиб бориладиган таълим – тўлиқ амалга ошириш ва эришиш мумкин бўлган мақсаддир», деди Кембриж университетининг Партнершип фор Эдуcатион ташкилоти Европа, Марказий Осиё ва Америкада таълим ислоҳотлари бўлими раҳбари Стив Кинг.

Ўқув дастурлари ислоҳоти, Вазирлар маҳкамасининг таълим стандартларини ишлаб чиқиш жараёни ва сифатини таъминлаш мезонларини белгиловчи 157-сонли қарорига мувофиқ, мактабгача таълим босқичидан бошлаб таълимнинг барча босқичларини қамраб олади. У таълим соҳасидаги манфаатдор томонлар ва ўқитувчилар билан кенг кўламли ҳамкорлик ва маслаҳатлашувларга асосланади.

ЮНИCЭФ қайд этишича, энг илғор халқаро билим ва тажрибаларга таянган ҳолда, ўқув дастурларини қайта кўриб чиқиш жараёнида илк бор ҳар бир фан гуруҳи ўз соҳасидаги юқори малакали халқаро экспертлар томонидан қўллаб-қувватланмоқда. Улар йил давомида гуруҳ билан мунтазам ишлаб, фаннинг ўқув дастурини тўлиқ қайта кўриб чиқишни якунлайди. Гарчи халқаро экспертлар ўқув дастурларини ишлаб чиқишда аввал ҳам иштирок этган бўлсаларда, бу ҳеч қачон барча фанлар ва синфларни тўлиқ қамраб олмаган ҳамда бу қадар чуқур ҳамкорликда яратиш жараёни бўлмаган, дейилади хабарда. Бундан ташқари, ўқув дастурларини қайта кўриб чиқиш жараёни илк бор пухта таҳлил, аниқ «йўл харитаси» ҳамда юқори самарали таълим тизимларига нисбатан кутилаётган натижалар ҳақидаги умумий тушунча билан мустаҳкамланмоқда.

Лойиҳа доирасида барча фанлар бўйича халқаро экспертлар, етакчи маҳаллий педагоглар, тадқиқотчилар, тренерлар ва амалиётчи ўқитувчиларни бирлаштирувчи онлайн ва офлайн семинарлар бошланди.

Шу ҳафта Кембрижнинг ўқув дастурлари бўйича экспертлари фан йўналишлари раҳбарлари учун икки кунлик семинар ўтказади. Семинар турли фанлар бўйича ўқув дастурларининг ўзаро уйғунлигини таъминлашга бағишланади.

Ушбу лойиҳа ишлаб чиқилиб, жорий этилгач, ҳар йили 8,8 миллион нафар мактабгача таълим ташкилоти тарбияланувчилари ва мактаб ўқувчиларини, жумладан, ногиронлиги, этник мансублиги ва ижтимоий-иқтисодий келиб чиқиши сабабли алоҳида эҳтиёжга эга бўлган болаларни қамраб олиб, улкан ўзгаришларга сабаб бўлади, дейилади хабарда.