Open AI асосчиси Сем Альтман инсон ва сунъий интеллектни бир-бирига боғлашни мақсад қилган янги Мерге Лабс лойиҳасини ишга туширди. Ушбу стартапнинг асосий вазифаси – ChatGPT чат-ботини инсон миясига тўғридан-тўғри улай оладиган махсус қурилма яратишдир.

Мерге Лабс нейрон сигналларини масофадан туриб ўқиш учун ультратовуш ва махсус молекулалардан фойдаланишни режалаштирмоқда. Ушбу усул бош суягини очмасдан туриб мия фаолиятини таҳлил қилиш имконини беради. Махсус сенсорлар худди оддий пластирь каби бош юзасига ёпиштирилади ва мия сигналларини ўқийди.

Нейрон сигналларини ультратовуш орқали ўқиш технологияси дастлаб «Форест Неуротеч» нотижорат лабораториясида ишлаб чиқилган. Бу лабораторияда аллақачон бош мия жароҳатини олган беморларда синовлар ўтказилган ва янги усулнинг барқарор хавфсизлиги тасдиқланган.

Open AI вакилларининг таъкидлашича, ушбу технология сунъий интеллект билан ўзаро алоқанинг энг «табиий усули»ни яратади. Албатта, ChatGPTʼга уланган инсонлар дунёдаги барча билимларни бир зумда миясига юклаб ололмайди, балки фақат фикр кучи орқали чат-ботга сўров юбориш имконига эга бўлади.

Шундай қилиб, Мерге Лабс қурилмалари Open AI маҳсулотлари учун ўзига хос масофавий бошқарув пульти вазифасини ўтайди.

Лойиҳа муаллифлари ушбу технологияни мукаммал даражага етказиш учун узоқ йиллар эмас, балки ўн йиллаб вақт кетиши мумкинлигини айтмоқда. Шунга қарамай, молиявий экспертлар биргина АҚШнинг ўзида нейроинтерфейслар бозорини 400 миллиард долларга баҳоламоқда.

Ҳозирги вақтда Мерге Лабс стартапининг умумий қиймати 850 миллион долларга етган. Энг йирик инвесторлар қаторида Сем Альтманнинг шахсан ўзи, Баин Cапитал инвестиция компанияси ва Валве асосчиларидан бири Гейб Нюелл бор.

Лойиҳа устида соҳанинг энг кучли мутахассислари, жумладан, Михаил Шапиро (Kaltex тадқиқот институти), Тайсон Афлало, Самнер Норман, шунингдек, World biometrik тизими асосчилари Алекс Блания ва Сандро Хербиглар иш олиб бормоқда. Сем Альтман ушбу лойиҳани ривожлантиришда шахсан иштирок этмоқда.