Бекободнинг «Металлург» футбол клуби фаолиятини қайта тиклади. Кеча, 23 январь куни «Металлург» футбол академиясида ташкил этилган тадбирда бу ҳақда маълум қилинди.

Тадбирда Ўзбекистон футбол ассоциацияси биринчи вице-президенти Равшан Эрматов, «Ўзметкомбинат» АЖ раҳбари Баҳодир Абдуллаев ва бошқа мутасаддилари иштирок этди.

«Ўзметкомбинат» АЖ ташаббуси билан қайта ишга туширилган клуб 2024 йилнинг декабрь ойида ўз фаолиятини тўхтатган эди.

Баҳодир Абдуллаевнинг маълум қилишича, тизимнинг нотўғри йўлга қўйилиши клубнинг иш фаолияти тўхтатилишига сабаб бўлган. Эндиликда бу хатога йўл қўйилмайди. Тизим жаҳон талабига жавоб берадиган даражада ташкил этилади. Ҳомийлар кўмагида клубнинг молиявий аҳволи ҳам яхшиланади.

Абдуллаевнинг таъкидлашича, у раҳбар бўлиб тайинлангач Бекобод тумани аҳолисидан клубни қайта тиклаш масаласида кўплаб илтимосномалар келиб тушган. Шундай бўлса-да, туман аҳолиси иштирокида 2 марта сўровнома ўтказилган. 20 мингдан зиёд аҳоли қатнашган сўровномада 80 фоиздан ортиқ одам клубнинг қайтишига овоз берган.

Бундан ташқари, «Ўзметкомбинат» АЖ ходимлари иштирокида ҳам сўровнома ташкил этилган. Бунда ишчиларнинг 90 фоизи клубнинг қайта ташкил этилишини қўллаб-қувватлаган.

Эндиликда Про лигада иштирок этиши айтилаётган «Металлург» клубига футбол мутахассиси Улуғбек Мирзаев директор этиб тайинланди. Жамоа бош мураббийи лавозимини эса Илҳом Мўминжонов эгаллади.

Мураббийлар штаби олдига Суперлигага чиқиш вазифаси қўйилган.

Маълумот учун, «Металлург» Бекобод футбол клуби 1945 йилда тузилган.