Ўзбекистоннинг Америкадаги элчиси Фурқат Сиддиқов ўзбекистонликлар учун АҚШ визасини соддалаштириш бўйича музокаралар бошланганини маълум қилди.

Унинг сўзларига кўра, аҳоли учун АҚШ виза режимини енгиллаштириш борасида мунтазам ҳаракат кетмоқда. Кутилган натижага эришиш эса осон кечмаслиги табиий.

«АҚШга визасиз киришга эришиш узоқ вақт талаб этадиган жараён. Лекин бу бўйича музокаралар олиб боряпмиз. Албатта, қанақа виза режимини жорий этиш, қандай шартлар қўйиш Америка ҳукуматининг ички сиёсатига боғлиқ. Ҳозирда нафақат АҚШга, балки Бразилия, Канада ва бошқа давлатларга ҳам аҳолимиз визасиз боришини таъминлаш борасида мунтазам музокаралар кетмоқда», деган элчи.

Сиддиқовнинг қўшимча қилишича, бугунги кунда ўзбек-америка муносабатлари тарихий чўққига чиққан. Икки давлат ўртасидаги ҳамкорликни ривожлантириш учун катта потенциал мавжуд.

«Ўтган йилнинг ўзида Ўзбекистон ва Америка президентлари ўртасида тўрт марта мулоқот бўлди. Икки марта телефон қўнғироғи ва икки марта Ню-Ёрк ҳамда Вашингтонда учрашувлар ташкил қилинди. Бунинг натижасида кенг кўламли келишувларга эришилган. Бу Америка ҳукуматининг Ўзбекистонда бўлаётган ислоҳотларга, мамлакат потенциалига эътиборини, биз билан ҳамкорлик қилишга тайёрлигини кўрсатади», деган Ўзбекистоннинг Америкадаги элчиси.

​Фурқат Сиддиқов, шунингдек, 2026 йил январь ойи якунидан Ўзбекистонда АҚШ фуқаролари учун 30 кунгача бўлган визасиз режим жорий этилишини ҳам маълум қилди.