Ўзбекистоннинг Венгриядаги элчихонаси Хорватия ва Сербияда ишлаётган ёки ушбу давлатларга ишлаш мақсадида чиқмоқчи бўлган фуқароларни эҳтиёткор бўлишга чақирди.

Маълум қилинишича, 2025-йил давомида консуллик бўлимига мазкур мамлакатларда меҳнат қилаётган фуқаролардан кўплаб шикоятлар келиб тушган. Таҳлил натижаларига кўра, инсофсиз иш берувчилар томонидан энг кўп учрайдиган қоидабузарликлар аниқланган бўлиб, улар қуйидагилар:

– иш ҳақининг мунтазам равишда тўланмаслиги ёки узоқ муддатга кечиктирилиши;

– вақтинчалик яшаш ва ишлаш учун рухсатномалар олишдаги муаммолар;

– ҳужжатларни рўйхатдан ўтказиш ва расмийлаштириш бўйича тўланган хизматлар учун такрорий (икки карра ва уч карра) йиғимлар;

– иш беришни рад этиш ва қўшимча тўловларни рад этган тақдирда депортатсия қилиш билан таҳдид қилиш;

– ноқонуний ишлаётган фуқароларни ўйлаб топилган баҳоналар билан тўсатдан ишдан бўшатиш ва кейинчалик ишлаб топилган маблағларни тўлашдан бош тортиш.

Қайд этилишича, элчихона ўз фуқароларининг ҳуқуқларини фаол ҳимоя қилиб, қоидабузар иш берувчилар билан музокаралар олиб борган. Хорватия ваколатли органларига расмий ноталар юбориб, фуқароларга суд ва маъмурий жараёнларда ҳамроҳлик қилган.

Шунингдек, муаммоларнинг катта қисми ноқонуний воситачилар орқали чет элга чиқиш ва ишга жойлашишнинг дастлаб ноқонуний ёки ярим қонуний каналлари туфайли юзага келади, дейилади хабарда.

Бундай ҳолатларнинг олдини олиш мақсадида элчихона Ўзбекистон фуқароларига Хорватия ва Сербияга ишлаш учун фақат Ўзбекистон Камбағалликни қисқартириш ва бандлик вазирлиги ҳузуридаги Ташқи меҳнат мигратсияси агентлигининг амалдаги литсензиясига эга бўлган литсензияланган хусусий бандлик агентликлари орқали чиқишни, шунингдек, тегишли литсензияга эга бўлмаган жисмоний шахслар ёки фирмаларга пул ўтказмасликни тавсия қилди.

Кейинчалик ноқонуний ишга жойлашиш мақсадида туристик, меҳмон визаси ёки бошқа ишчи бўлмаган визалар билан чиқмаслик керак, дейилади хабарда. Бундай ҳуқуқбузарлик маъмурий чиқариб юбориш, 5 йилгача бўлган муддатга Шенген ҳудудига киришни тақиқлаш ва жиноий жавобгарликка сабаб бўлиши мумкин.

Бундан ташқари, меҳнат шартномасини имзолашдан олдин уни ўзбек ёки рус тилига таржима қилишни талаб қилиш ва барча шартларни, айниқса ишлаш ва яшаш учун рухсатнома олишга тааллуқли шартларни диққат билан ўрганиб чиқиш зарур.

Фуқаролар ҳар қандай муаммолар (иш ҳақини кечиктириш, таҳдидлар, ноқонуний йиғимлар ва бошқалар) юзага келганда дарҳол Ўзбекистоннинг Венгриядаги элчихонаси консуллик бўлимига шошилинч алоқа телефонлари (+36 304 362 636) ёки элчихона расмий сайтида кўрсатилган мессенжерлар орқали мурожаат қилиши мумкин.

“Элчихона барча фуқароларни меҳнат мигратсияси каналини танлашда максимал даражада ҳушёр бўлишга чақиради. Фақат қонуний ишга жойлашиш сизнинг ҳуқуқларингиз ва қонуний манфаатларингизни чет элда ҳимоя қилишни кафолатлайди”, — дейилади хабарда.