“Солиқларнинг йиғилувчанлик даражасини ошириш ва фаол солиқ тўловчиларни рағбатлантириш чора-тадбирлари тўғрисида”ги Президент қарори (ПҚ–364-сон, 28.11.2025 й.) қабул қилиниб, қарор билан солиқ муносабатларини ташкил этишда янгича ёндашув қўлланади. Бу ҳақда Адлия вазирлиги маълум қилди.

Қарорга кўра, 2026 йил 1 январдан бошлаб жисмоний шахслар “Очиқ бюджет” порталида ўзлари томонидан тўланган солиқлар ҳисобидан амалга ошириладиган бюджет харажатлари маълумотларини “Жисмоний шахсларнинг солиқлари ҳисобидан харажатлар” модулида кўриши мумкин бўлади.

Бунда қуйидагилар доимий равишда эълон қилиб борилади:

- жисмоний шахс томонидан муайян даврда тўланган даромад солиғи, мол-мулк ва ер солиғи тўғрисидаги маълумот;

- тўланган солиқлар эвазига Давлат бюджетидан амалга оширилган харажатлар тўғрисидаги маълумотлар.

2026 йил 1 январдан Наманганда янги солиқ бошқаруви моделини жорий этиш бўйича қуйидагиларни назарда тутган ҳолда эксперимент ўтказилади:

- жисмоний шахслардан олинадиган мол-мулк ва (ёки) ер солиғи бўйича 1 млн сўмдан ошган солиқ қарздорлигини ундиришда электр энергиясининг биллинг тизими механизмидан фойдаланишни жорий этиш;

- солиқ органлари фаолиятини баҳолашда инсон омили таъсирисиз автоматик шаклланадиган энг муҳим самарадорлик кўрсаткичларини жорий этишни тизимли давом эттириш.

2026 йил 1 январдан жисмоний шахслар томонидан кўчмас мулкларни ижарага беришдан олинган даромад бўйича тўланган солиқ тўлиқ миқдорда мулк жойлашган туман (шаҳар) маҳаллий бюджетларига йўналтирилади.