Тошкент ва Самарқанд ўртасидаги тезюрар темир йўл қатнов вақтини 1.5 соатгача қисқартиради, деб хабар берди Spot.

Хабарда ёзилишича, Жанубий Корея компанияси томонидан ишлаб чиқилган лойиҳада темир йўл магистрали Тошкентнинг янги аэропорти орқали ўтади.

Компания лойиҳанинг учта вариантини ишлаб чиққан. Булар:

▪️ темир йўл узунлиги 282 км, ҳаракат вақти 1 соат 26 дақиқа, ўртача тезлик 185.7 км/соатни ташкил этади. Умумий узунлиги 8.9 км бўлган 74 та кўприк ва 3 та туннель қурилиши кўзда тутилган.

▪️ магистралнинг узунлиги 291.7 км. Бунда ўртача тезлик 179.4 км/соатгача пасаяди, йўлга сарфланадиган вақт эса 1 соат 33 дақиқагача ортади. Лойиҳа доирасида 82 та кўприк ва 16 км узунликдаги 1 та туннель қурилади.

▪️ юқори тезликдаги темир йўлнинг узунлиги 302 км.дан ортиқ. Ўртача тезлик 166.9 км/соат бўлганда Тошкентдан Самарқандгача бўлган масофа 1 соат 45 дақиқа давом этади. Йўналиш умумий узунлиги 9.6 км бўлган 105 та кўприк ва 2 та туннелни ўз ичига олади.

Транспорт вазири ўринбосари Жасурбек Чориевнинг сўзларига кўра, Ўзбекистонда мавжуд темир йўлларининг транзит салоҳияти чекланган, чунки (йўловчи ташишдан ташқари) мамлакат орқали ўтадиган юк ташувлари ҳам мавжуд.

«Битта линиядан бир вақтнинг ўзида юк ва йўловчи ташишда фойдаланиш имконсиз, биз уни янада кенгайтира олмаймиз. Албатта, биз операцион жараёнларни оптималлаштиряпмиз, лекин шу билан бирга, махсус тезюрар темир йўл линиясини қуриш муҳим», деган у.

Транспорт вазири ўринбосарининг таъкидлашича, лойиҳанинг техник-иқтисодий асослари грант ажратган Корея Эксимбанки кўмагида ишлаб чиқилган. Яқинда харид қилинган 6 та Hyundai Rotem поездлари шу йил охиридан бошлаб етказиб берилади, кейинги йил бошидан эса йўловчиларга хизмат кўрсата бошлайди.