13 ноябрь куни Ислом цивилизацияси марказида бошланган «Марказий Осиё: умумий маънавий-маърифий мерос – умумий келажак» мавзусидаги халқаро конгресс иш ўз ишини 14 ноябрь куни «Ўзбекистон» халқаро анжуманлар саройида Марказий Осиё ва Озарбайжон маданият вазирларининг илк учрашуви билан давом эттирди.

Мазкур учрашувда Ўзбекистон Республикаси маданият вазири Озодбек Назарбеков, Қозоғистон Республикаси маданият ва ахборот вазири Аида Балаева, Қирғиз Республикаси маданият, ахборот ва ёшлар сиёсати вазири Мирбек Мамбеталиев, Тожикистон Республикаси маданият вазири Матлуба Сатториён, Туркманистон маданият вазири Атагелди Шамирадов ва фахрий меҳмон сифатида Озарбайжон Республикаси маданият вазири Адил Керимли иштирок этишди.

Мажлис қамрови ва даражаси жиҳатида илк бора ўтказилди.

Хабарга кўра, мажлисда кўп томонлама ҳамкорликнинг турли масалалари кўриб чиқилиб, маданият ва санъатнинг турли йўналишларидаги ҳамкорлик масалалари муҳокама қилинган.

Учрашув кун тартибидан қуйидаги масалалар ўрин олган:

▪️ Минтақавий маданий ҳамкорликнинг жорий ҳолати ва истиқболлари;

▪️ Минтақадаги маданият арбоблари ўртасида маданий алмашинувни кенгайтириш;

▪️ Марказий Осиё учун маданий брендни ривожлантириш.

Марказий Осиё давлатлари маданият вазирлари Тошкентда минтақавий маданий ҳамкорликни кенгайтириш бўйича келишувларга эришди.

Вазирлар Марказий Осиё давлатлари ўртасидаги тарихий, маданий ва маънавий яқинлик минтақавий бирдамликни мустаҳкамловчи муҳим омил эканини таъкидлади.

Томонлар 2022 йилда имзоланган «XXI асрда Марказий Осиёни ривожлантириш йўлида дўстлик, яхши қўшничилик ва ҳамкорлик тўғрисидаги шартнома» тамойилларига содиқлигини яна бир бор тасдиқлади.

Учрашув давомида маданий алоқаларни янада кенгайтириш, халқлар ўртасида ўзаро ҳурмат ва бағрикенгликни мустаҳкамлаш, шунингдек, минтақада тинчлик ва ўзаро тушунишни ривожлантиришга қаратилган ташаббуслар кўриб чиқилди. Томонлар санъат, адабиёт, кино, театр ва мусиқа соҳаларида қўшма тадбир ва фестивалларни ўтказишни ҳам қўллаб-қувватлади.

Маданий меросни ўрганиш, тиклаш ва рақамлаштириш бўйича қўшма лойиҳаларни кенгайтириш, ёш ижодкорлар ўртасидаги алмашинув дастурларини ривожлантириш, семинарлар, конференциялар ва ёзги мактабларни ташкил этиш масалалари бўйича келишувга эришилди. Шунингдек, маданият ва санъат йўналишида кадрлар тайёрлаш ва малака ошириш борасида ҳамкорликни кучайтириш нияти билдирилди.

Шу билан бирга, вазирлар «Марказий Осиё маданий бренди»ни ишлаб чиқиш бўйича ишчи гуруҳ тузиш имкониятини кўриб чиқиш таклифи қўллаб-қувватланди.

Учрашув якунида, ҳамкорлик юзасидан тенг кучга эга беш нусхада баённома имзоланди.

Куннинг кечки қисмида маданият вазирлари пойтахтдаги Алишер Навоий номидаги Ўзбекистон давлат академик катта театрида Қозоғистон Республикасининг театр вакиллари томонидан саҳналаштирилган ва ижро этилган «Хан Султан. Олтин Ўрда» спектаклининг намойишида иштирок этишди.