Жанубий Кореяда университетга қабул талаблари кучайтирилди. Энди мактаб даврида буллинг қилган абитуриентлар ўқишга киролмайди. Янги тартиб ўнлаб ўқувчилар учун амалда қўлланилди. Бу ҳақда маҳаллий нашрлар хабар бермоқда.

Кореяда бўлажак талабаларни саралаш жараёнига кескин таъсир қилувчи янги тартиб-қоидалар кучга кирди. Энди мамлакат университетлари абитуриентларнинг нафақат академик ютуқларини, балки уларнинг мактаб давридаги хулқ-атворини ҳам диққат билан ўрганади. Бу тартиб аллақачон амалиётга татбиқ этилиб, мактабдаги безориликлари учун 45 нафар ўқувчига қўлланилди. Натижада улар талаба бўлолмаган. Бу ўқувчиларни қабул қилишдан бош тортган университетлар орасида илғор давлат университетлари, хусусан, Сеул Миллий университети ва Кёнбок университетлари ҳам бор.

Ушбу тартибга кўра, ўқувчининг хулқ-атвори ҳам баҳоланади: мактаб йилларидаги безориликлар учун жарима баллари ҳисобланади. Бу баллар университетга киришда ҳал қилувчи аҳамиятга эга бўлади. Шу тариқа, зўравонлик ёки безорилик билан боғлиқ тартиб бузарликлар қабул комиссиясининг эътиборидан четда қолмайди.

2026 йилдан бошлаб мамлакатдаги барча университетлар абитуриентнинг мактаб давридаги хулқ-атворини инобатга олиши шарт бўлади. Айниқса, талаб-қоидалар педагогик университетларда кучлироқ бўлади: номзоднинг ҳар қандай даражадаги зўравонлиги аниқланса, унинг аризаси автоматик тарзда бекор қилинади.

Мутахассислар таъкидлашича, ушбу қоидалар нисбатан соғлом таълим муҳитини яратиш ва ёшлар ўртасида зўравонликка қарши профилактика ўтказиш мақсадида ишлаб чиқилган.

Янги тартиб жамиятда резонансга сабаб бўлди: ота-оналар ва ўқувчилар ўтмишнинг келажакка қанчалик таъсир қилиши мумкинлигини муҳокама қила бошлади, университетлар бўлса абитуриентларнинг нафақат билими, балки шахсий сифатлари ҳам қанчалик муҳим эканини таъкидламоқда.

Ҳукумат вакиллари ушбу тартиб мактабдаги зўравонлик ҳолатларини камайтиришига ва ўсмирлар орасида жавобгарлик ҳиссини орттиришига ишонч билдирмоқда. Энди ҳар бир битирувчи ўзининг мактабдаги хатти-ҳаракатлари ҳаёт йўлини ҳал қилувчи фактор эканини ёдда тутади.

Янги тартибга нима туртки бўлди?

2023 йилда мамлакат собиқ прокурори Чон Сун Син иштирокидаги шов-шувли жанжалдан кейин университетларга қабул талабларини кучайтириш чора-тадбирлари қўллаб-қувватланди. Собиқ прокурорнинг бошқа талабаларни буллинг қилган ўғли атиги 2 балл пастроқ натижа билан университетга қабул қилинади. Ушбу воқеа ортидан юзага келган жамоатчилик норозилиги университетларни мактабда зўравонлик қилган абитуриентларга нисбатан жиддий чора қўллашга чақирувчи умуммиллий реформага сабаб бўлди.