Ижтимоий тармоқларда тарқалган «ОИТС (СПИД)га чалинган шахслар ўриндиқларга игна қўйиб кетмоқда» мазмунида хабарлар тарқалди. Видеода кўрсатилишича, гўё кимлардир юқумли касалликларни бошқа фуқароларга юқтириш мақсадида фойдаланилган тиббий игнани ўриндиқларга жойлаштирган ва бундан одамлар зарар кўраётгани акс эттирилган. Тошкент шаҳар Ички ишлар бош бошқармаси мазкур хабарлар ҳақиқатга тўғри келмаслигини маълум қилди.

Ўтказилган суриштирувлар натижасида видеони тайёрлаган ва тарқатган шахслар аниқланган.

«Ўртоғим мана шунақа, СПИД ҳақида видео олайлик деган эди. Қилган ишимдан пушаймонман. Бутун халқдан узр сўрайман. Мен бунақа оммага чиқиб кетишини билмагандим» деди видео айбланувчилардан бири.

«Бир ғоя келиб қолди. Инстаграмни кўриб, биз ҳам шу видеони такрорламоқчи бўлдик, ўриндиққа игна қўйиб кетганини. Кейин шу видеони олдик. Бунақа асосдаги видеони «просмотр», «лайк» учун қилувдим. Бошқа блогерларга бунақа ёлғон маълумот тарқатишни маслаҳат бермайман. оқибатлари ёмон нарсаларга олиб келади. Қилган ишимдан афсусдаман. Халқдан узр сўрайман» деди айбланувчиларнинг яна бири.

Якунда, видеони тайёрлаб тарқатган икки шахсга нисбатан Маъмурий жавобгарлик тўғрисидаги кодекснинг 202-2-моддаси («Ёлғон ахборот тарқатиш») бўйича ҳуқуқий ҳужжатлар расмийлаштирилиб, Жиноят ишлари бўйича Мирзо Улуғбек туман судига юборилган.