Фарғона туманининг Оқбилол қишлоғида 2 ноябрь куни қаттиқ маиший чиқиндиларни ёқиш орқали электр энергияси ишлаб чиқариш лойиҳаси доирасида ташкил этилаётган корхона қурилишига старт берилди. Бу ҳақда Фарғона вилояти ҳокимлиги матбуот хизмати хабар берди.

Лойиҳа Хитойнинг China Everbright International Ltd компанияси томонидан қарийб 150 миллион доллар инвестиция билан ташкил этилмоқда. Тадбирда вилоят ҳокимининг ўринбосарлари Нуриддин Мамажонов, Ҳакимжон Долимов, хитойлик инвесторлар, масъул мутасаддилар иштирок этди.

Хабарда айтилишича, Хитой компанияси билан ҳамкорликда амалга оширилаётган ушбу лойиҳа “вилоятнинг иқтисодий салоҳияти янада ошишига ҳамда электр энергияси таъминоти янада яхшиланишига хизмат қилади”.

Корхона йилига 547 минг тонна (кунига 1,5 минг тонна) маиший чиқиндиларни экологик жиҳатдан хавфсиз термик усулда қайта ишлаб, 227,5 млн кВт электр энергияси ишлаб чиқариш қувватига эга бўлади.

“Ушбу корхонанинг ишга тушиши чиқиндиларнинг полигонларда йиғилишини кескин камайтириш, экологик ҳолатни яхшилаш ва энергетика соҳасида барқарорликка эришиш имконини беради”, — дея таъкидлади ҳокимлик.

Шунингдек, корхонада 400 нафарга яқин янги иш ўринлари ташкил этилиши ҳамда маҳаллий мутахассислар замонавий технологиялар асосида малака ошириш имкониятига эга бўлиши кўзда тутилган.

Эслатиб ўтамиз, 2025−2027 йилларда Ўзбекистоннинг 7 та ҳудудда — Тошкент шаҳри, Андижон, Наманган, Фарғона, Тошкент, Қашқадарё ва Самарқанд вилоятларида қаттиқ маиший чиқиндиларни ёқиш орқали электр энергияси ишлаб чиқарувчи заводлар қурилиши режалаштирилган.