«Театр ва кино актёри, Ўзбекистон халқ артисти Ёқуб Аҳмедов бугун, 30-октабр куни вафот этди. 

Машҳур санъаткор 1938 йилнинг 3 январь куни Наманганда таваллуд топган. Тошкент театр ва рассомлик санъати институтини тугатгандан сўнг, 1958 йилдан бери Ҳамза номидаги Ўзбек Давлат академик драма театри актёри, 1992 йилдан эса шу театрнинг директори лавозимида фаолият кўрсатди.

Ёқуб Аҳмедов узоқ йиллар шу ижодий жамоада ишлаш жараёнида 50 дан ортиқ спектаклларда асосий ролларни ўйнади. Дастлаб Уйғуннинг «Парвона» асари асосида саҳналаштирилган спектаклда Муроджон ролини ўйнаган актёр кейинчалик кўплаб машҳур ролларни ижро этди.

Ёқуб Аҳмедовни кенг санъат мухлисларига танитган илк образ – бу Туроб Тўла сценарийси асосида, режиссёр Аъзамов томонидан 1958 йилда суратга олинган «Фурқат» фильмидаги Фурқат образи эди. Шундан кейин Ёқуб Аҳмедов Окхой («Ганга қизи»), Азизбек («Ўтган кунлар»), Амир Олимхон («Қора консулнинг ҳалокати»), Шайх («Ҳамза»), Султонали («Меҳробдан чаён») ва бошқа ролларда ўйнади.

Шунингдек, Ёқуб Аҳмедов «Ўзбекфилм» киностудиясида дубляж қилинган 400 дан ортиқ фильмга овоз берган.

Ёқуб Аҳмедовнинг сермаҳсул ижоди учун «Ўзбекистон халқ артисти» унвони, 1977 йилда Давлат мукофоти билан тақдирланган. 1997 йилда «Дўстлик» ордени билан мукофотланган.