Ўзбекистон Республикаси Президенти матбуот котиби Шерзод Асадов мамлакатнинг ташқи сиёсатини давлат раҳбарининг Брюсселга ташрифи мисолида таҳлил қилди.

Қайд этилишича, Ўзбекистоннинг ташқи сиёсати изчиллик ва тизимлиликка асосланган. Унинг мазмун-моҳияти – Марказий Осиёда яхши қўшничилик ва ишонч муҳитини мустаҳкамлашдан тортиб, Россия, Хитой, АҚШ, Европа Иттифоқи каби жаҳон марказлари ҳамда бошқа иттифоқдош ва ҳамкорлар билан стратегик шерикликни ривожлантиришдир.

Унга кўра, Шавкат Мирзиёев халқаро муносабатларни халқнинг миллий манфаатлари ва устувор йўналишларидан келиб чиққан ҳолда шакллантираётгани асосий тамойил сифатида қолади.

Ташқи сиёсатдаги ҳар бир қадам фуқаролар фаровонлигини ошириш, инвестицияларни жалб қилиш, илғор технологияларни жорий этиш ва юртимиз имкониятларини кенгайтиришга хизмат қилаётгани қайд этилади.

Таъкидланишича, давлат раҳбарининг Брюсселга ташрифи бу сиёсатнинг навбатдаги амалий ифодаси бўлиб, Европа Иттифоқи комиссари Марта Кос Президентга «Ўзбекистон янгиланишлар суръатини белгилаяпти» дея мамлакат раҳбарига «Сиз – азму шижоатли инсонсиз» дея мурожаат қилган.

Асадов бу сўзлар шунчаки дипломатик илтифот эмас, балки ислоҳотлар натижасига берилаётган ҳақиқий баҳо, Ўзбекистоннинг жаҳон сиёсатидаги янги ролининг эътирофи эканини айтади. Унга кўра, ташриф форматининг ўзиёқ, бир вақтнинг ўзида Европа кенгаши Президенти Антониу Кошта ва Европа комиссияси Президенти Урсула фон дер Ляен билан музокаралар ўтказилгани мулоқотнинг стратегик даражасини ва Президентимизга бўлган юксак ишончни яққол намоён этган.

Ташрифнинг асосий натижаси Ўзбекистон Республикаси ва Европа Иттифоқи ўртасида Кенгайтирилган шериклик ва ҳамкорлик тўғрисидаги битимнинг имзоланиши бўлди. Ушбу ҳужжат икки томонлама муносабатларнинг ҳуқуқий асосини янгилаб, сиёсат, савдо, инвестициялар, таълим, инновациялар, иқлим масалалари ҳамда инсон ҳуқуқлари борасидаги ҳамкорлик учун янги имкониятлар яратди. 10 миллиард евродан ортиқ қийматдаги келишувларга эришилди, қўшма лойиҳаларнинг умумий портфели эса 40 миллиард евродан ошди. Бу мамлакатимиз учун янги инвестициялар, замонавий технологиялар, минглаб иш ўринлари ва инсон капиталининг ривожланиши демакдир.

Асадов шунингдек, Ўзбекистон ўз географик жойлашувини мураккаб масаладан устунликка айлантираётганини қайд этади. Президент ташаббуси билан Ўзбекистон «land-locked», яъни денгиз портларига чиқиш имконияти чекланган мамлакатдан босқичма-босқич «land-linked» давлатга, яъни Европа ва Осиё бозорларини боғловчи кўприкка айланмоқда. Транспорт йўлаклари, саноат ва логистика занжирлари, рақамли интеграцияни ривожлантириш орқали Евроосиё маконидаги асосий чорраҳалардан бири сифатида саҳнага чиқмоқда. Қолаверса, Европа Иттифоқи билан Жаҳон савдо ташкилотига аъзо бўлиш бўйича музокаралар ҳам якунланди. Бу Ўзбекистоннинг барқарор ва ишончли халқаро иқтисодий шерик сифатидаги нуфузини янада мустаҳкамлайди.

«Изчиллик, очиқлик ва натижадорлик – Президентимиз ташқи сиёсатининг асосий тамойилларидир. Ҳар бир келишув, ҳар бир ташриф, ҳар бир қарор ягона мақсад – Ўзбекистон халқининг манфаатларини ҳимоя қилиш ва унинг халқаро майдондаги обрўсини янада оширишга хизмат қилади».