Туркия президентининг фармонига кўра, бошқа мамлакатлардан бўлган этник туркларга Туркия фуқаролари билан тенг равишда касб-ҳунар билан шуғулланиш ҳуқуқи берилади. Бу ҳақда ТРТ маълум қилган.

Туркияда хорижий туркларнинг меҳнат фаолиятини тартибга солувчи фармон кучга кирди. Ҳужжат туркийларнинг давлат (қуролли кучлар ва хавфсизлик хизматидан бошқа) ва хусусий ташкилотларда эркин фаолият юритиши ва ҳунармандчилик билан шуғулланиш ҳуқуқини таъминлайди.

Туркий хорижликлар Туркия қонунчилигида белгиланган касбий талабларга мувофиқ ишлаш рухсатномасини олади. Рухсатнома бериш бўйича қарор Ички ва Ташқи ишлар вазирликларининг фикри билан Меҳнат ва ижтимоий ҳимоя вазирлиги томонидан қабул қилинади.

Рухсатнома олган хорижликлар Туркия фуқаролари билан тенг равишда Профессионал уюшмаларда рўйхатдан ўтиши талаб қилинади. Шундан кейин улар сайловларда иштирок этиш ва сайланишдан бошқа барча уюшмага аъзоликнинг барча ҳуқуқларидан фойдаланиши мумкин бўлади.

Қонун шунингдек, бу шахсларни мамлакатда яшаш ва ишлаш учун Туркия фуқаролигини олиш мажбуриятидан озод этади. Бунда сиёсий ҳуқуқлар истисно қилинади. Қонун ижроси тегишли вазирликларга юклатилган. Уни қўллаш тартиби бўлса президент фармони билан белгиланади.