Тошкент шаҳар жамоат транспорти тизимини ривожлантириш, экологик тоза ва энергия тежамкор транспорт воситаларини жорий этиш доирасида 13 ноябрь куни «Yutong» компаниясида ишлаб чиқарилган 202 дона замонавий электробус “Тошшахартрансхизмат” АЖга топширилди. Бу ҳақда Транспорт вазирлиги хабар берди.

Ушбу электробуслар экологик тоза электробуслар шаҳар атроф муҳитини яхшилаш ва жамоат транспорти тизимини ривожлантиришга муҳим ҳисса қўшади.

Янги электробуслар калитини тантанали топшириш маросимда Тошкент шаҳар ҳокими, Транспорт вазири, Олий Мажлис Қонунчилик палатаси депутатлари, Жамоатчилик кенгаши вакиллари ҳамда оммавий ахборот воситалари ва блогерлар иштирок этди.

Қайд этилишича, 2025 йилнинг иккинчи чорагида пойтахт жамоат транспорти орқали кунлик йўловчи ташиш ҳажми 1,4 миллион кишига етган. Бу кўрсаткич хизмат ҳажмини 27 фоизга ошишини таъминлади.

Йўналишларнинг умумий узунлиги ҳам 2 945 километрдан 2 990,8 километргача кенгайтирилди. Бу ўзгаришлар натижасида жамоат транспортининг ўртача тезлиги 18 километр/соатдан 21 километр/соатгача ошди.

Харид қилинган 202 дона электробус ва улар учун ўрнатилган 100 дона қувватлаш ускуналари жамиятда экологик тоза транспорт улушининг сезиларли даражада ортишига хизмат қилади. 2030 йилгача бўлган ривожланиш стратегиясида 1 200 дона электробус харид қилиш режалаштирилган. Натижада жамоат транспорти паркларида электробуслар улуши 50 фоиздан 63 фоизгача етади.

Сўнгги йилларда Тошкент шаҳри жамоат транспорти ҳаракат таркибини янгилаш бўйича амалга оширилган ишлар натижасида автобуслардан ҳавога чиқадиган зарарли моддалар миқдори ойига 93,3 тоннага камайган.