UzAuto Motors моделлар қатори кенгайтирилиши ва янги модификациялар ишлаб чиқарилишини маълум қилди. Бу бўйича стратегик дастур фаол амалга оширилмоқда.

Хабарга кўра, ташкил қилинаётган ишлаб чиқариш қувватларида (кичик бизнес ва хусусий мижозларнинг талаб ва истаклари инобатга олиниб) Damas арзон минивенларининг янги версияси ишлаб чиқилади.

«Янги Damas ихчам, тежамкор ва сиғимдор автомобиль бўлиб, у шаҳар ичидаги кундалик ҳаракатлар учун ҳам, тижорий фаолиятда фойдаланиш учун ҳам жуда қулайдир. Фарқли хусусиятларига — ўлчамларнинг катталашгани, юк кўтариш қобилияти ва сиғимнинг ошгани, шунингдек, ҳайдовчи ҳамда йўловчилар қулайлигининг сезиларли даражада яхшиланганидир. Модель Damas Move йўловчи версиясида ва Damas Max юк-йўловчи версиясида мавжуд бўлади», дейилади хабарда.

Маълум бўлишича, янги модель айни пайтдаги жорий Damas версияси билан бир вақтда ишлаб чиқарилади, бу эса харидорларга синовдан ўтган классик модель ҳамда замонавий технологик янгиликларга эга янги авлод автомобили ўртасида эркин танлов қилиш имконини яратади.

UzAuto Motors модель қаторини кенгайтириш билан бир вақтда, энг кўп талаб этиладиган моделларидан бири Chevrolet Cobalt'ни ҳам кенг кўламли модернизация қилган.

Ҳозирда мавжуд комплектацияларига қўшимча равишда мижозларга иккита янги — Cobalt Style M ва Cobalt Midnight M версиялари тақдим этилади. Уларнинг ҳар бири кенгайтирилган опсиялар тўплами, замонавий технологиялар, яхшиланган комфорт ва юқори хавфсизлик даражаси билан ажралиб туради.

«Янги модификациялар Ўзбекистон, Қозоғистон ва бошқа экспорт бозорларидаги Cobalt эгалари ўртасида ўтказилган сўров натижаларига асосланиб ишлаб чиқилди. Ўзбекистон ва хориждаги респондентларнинг 90 фоиздан ортиғи автомобилни завод босқичиданоқ замонавий функциялар ва кенгайтирилган комплектациялар билан таъминлаш зарурлигини билдирган. Натижада янгиланган Cobalt илгари мавжуд бўлмаган 12 та янги опсия билан жиҳозланди. Ушбу янгиликлар автомобилдан фойдаланиш қулайлигини ошириб, моделнинг технологик имкониятларини сезиларли даражада оширди. Модернизация жараёнида автомобилнинг двигатели янгиланди, ABS тизими такомиллаштирилди, шунингдек, двигатель ва унинг тизимларини бошқарувчи янги блок ўрнатилди. Бундан ташқари, хавфсизлик ёстиқчалари ва ҳимоя функциялари учун замонавий бошқарув блоклари, ҳамда янги авлод диагностика модули жорий этилди. Мижозлар учун Android Auto ва Apple CarPlay'ни қўллаб-қувватлайдиган сенсорли мультимедиа тизими, круиз-контроль тизими, эко-чармдан қилинган ўриндиқлар, олд ўриндиқларнинг иситиш функцияси, янги асбоблар панели ҳамда мультимедиа ва круиз-контролни бошқариш тугмалари билан жиҳозланган руль, шунингдек, интерьернинг янги декоратив элементлари каби бир қанча янги опсиялар мавжуд бўлади. Жами 50 дан ортиқ асосий автомобиль компонентлари янгиланди», дейилади хабарда.

Таъкидланишича, Cobalt моделини ривожлантиришнинг кейинги босқичи автомобилнинг ташқи кўринишини (фейслифт) ўзгартириш бўлиб, «UzAuto Motors» мутахассислари бу йўналишда ишларни аллақачон бошлашган.

Янги Cobalt модификацияларининг ишлаб чиқарилиши мавжуд комплектациялар билан параллел равишда йўлга қўйилган.

Хабарда ёзилишича, энди мижозлар жиҳозланиш даражаси ва функционаллиги билан фарқланувчи Cobalt'нинг тўрт хил модификациясидан бирини танлаш имкониятига эга. Автомобилларнинг нархлари ҳамда сотув бошланиши саналари бўйича батафсил маълумот кейинчалик эълон қилинади.