Ўзбекистон ва АҚШнинг қатор минтақавий ва глобал масалалар бўйича позициялари бугун тобора яқинлашиб бормоқда. Бу ҳақда президентнинг ташқи сиёсат бўйича маслаҳатчиси Абдулазиз Комилов «Ўзбекистон 24» телеканалининг Давра подкастида маълум қилди.

«Бир нарсани айтиб ўтиш керак, қандай манфаатларимиз бор Америкада? Авваламбор, Американинг ички ялпи маҳсулоти бутун дунёда энг катта. 29−30 триллионга етяпти, тўғрими? Бошқа катта, энг йирик давлатларники 18 триллиондан пастга кетади. Шунинг учун буни солиштириб бўлмайди», – деди Комилов.

У АҚШ технология нуқтаи назаридан энг ривожланган ва жуда катта ҳарбий қудратга эга давлат бўлиб қолаётганини таъкидлади.

«Ҳозир мана президент Трамп билан бизнинг дунёқарашимиз, бизнинг муносабатларимиз регионал, минтақавий ва халқаро масалаларга бир-бирига жуда яқин бўляпти» – деди маслаҳатчи.

Комилов президент Шавкат Мирзиёевнинг Ғазодаги вазият бўйича позициясини мисол қилиб келтирди.

«Ҳурматли президент Ғазода содир бўлаётган воқеалар масаласини жуда кескин кўтарди. У муаммога ечим топиш, бу қарама-қаршилик ва зўравонликни тўхтатиш зарурлиги ҳақида таклифлар билан чиқди. Чиндан ҳам, бошқа давлатлар таъкидлаганидек, у ерда очиқдан-очиқ геноцид содир бўлмоқда,» — деди у.

Собиқ ташқи ишлар вазирининг сўзларига кўра, яқинда АҚШ президенти Доналд Трамп минтақадаги зўравонликка барҳам беришга қаратилган янги ташаббус билан чиққан. Ғазодаги урушни тўхтатиш режаси 20 банддан иборат бўлиб, барча исроиллик гаровга олинганларни озод қилиш, Исроил қўшинларини олиб чиқиб кетиш, агар ҲАМАС аъзолари секторни тарк этса, уларга амниция эълон қилиш, шунингдек, халқаро кучларни киритиш ва ташқи маъмурият тузишни назарда тутади.

«Қўшма Штатлар президенти икки-уч кун олдин янги ташаббус билан чиқди. Шахсан мен кўп йиллар давомида Яқин Шарқда ишлаганман ва бу ташаббусни қўллаб-қувватлаш мумкин, деб ҳисоблайман», — деди у.

Президент маслаҳатчиси ташаббусни энг йирик араб давлатлари раҳбарлари қўллаб-қувватлаганини қўшимча қилиб, тинчлик жараёнининг янада ривожланиши Тошкент ва Вашингтон позицияларини янада яқинлаштиришига ишонч билдирди.

«Агар бу жараён давом этса ва тинчликка эришилса, президентимизнинг позицияси ва муносабати АҚШ позициясига янада яқинлашади. Шунинг учун биз нафақат бизнес соҳасида, балки бошқа йўналишларда ҳам ҳамкорликни ривожлантирмоқдамиз», — дея таъкидлади Комилов.

9-октабр куни АҚШ президенти Доналд Трамп Исроил ва Фаластиннинг ҲАМАС ҳаракати тинчлик ўрнатишнинг биринчи босқичи бўйича келишув тузганини маълум қилди. Sky News Arabia манбаларига кўра, ўт очишни тўлиқ тўхтатиш, Исроил армиясини Ғазо секторининг 70 фоиз ҳудудидан босқичма-босқич олиб чиқиб кетиш ва бир вақтнинг ўзида асирларни озод қилиш бўйича келишувга эришилган.

Ўзбекистон президенти Шавкат Мирзиёев 20−24-центабр кунлари Ню Йоркда бўлиб ўтган БМТ Бош ассамблеясининг 80-сессиясида иштирок этиш учун АҚШга амалий ташриф билан борди. Асосий воқеалардан бири АҚШ президенти Доналд Трамп билан учрашув бўлиб, у эришилган келишувлар кўламини қайд этди. Абдулазиз Комилов президентлар Шавкат Мирзиёев ва Доналд Трампнинг музокаралари Ўзбекистон-АҚШ муносабатларини барқарорлик ва олдиндан айтиш мумкин бўлган даражага олиб чиққанини таъкидлади.

Бундан ташқари, Мирзиёев БМТ Бош ассамблеяси йиғилишида нутқ сўзлаб, глобал муаммоларни ҳал қилишда ташкилотнинг ролини таъкидлади, «Янги Ўзбекистон» ислоҳотлари билан таништирди ҳамда халқаро ҳамкорлик ва тинчликни мустаҳкамлашга чақирди.