Президентнинг ижро этувчи ҳокимият органлари фаолиятида рақамлаштиришни кенгайтириш ҳисобига бошқарув штат бирликлари сонини мақбуллаштиришга қаратилган фармони қабул қилинди.

Ушбу фармонга асосан ижро ҳокимиятининг 2141 та штат бирлиги, жумладан, бюджет ташкилотларидан 1863 та, бюджетдан ташқари жамғармадан эса 278 та лавозим штат жадвалидан чиқарилади.

Энг кўп қисқартиришлар 498 та ўрин билан Солиқ қўмитаси, 224 та штат билан Сув хўжалиги вазирлиги, 200 та иш ўрни билан Қишлоқ хўжалиги вазирлиги ва 163 та билан Бандлик вазирлиги ҳисобига тўғри келади.

Шу билан бирга қўмиталардан 4 та, агентликлардан 6 та ҳамда инспекциялардан 6 та, жами 16 та раҳбар ўринбосарлари штати тугатилади.

Бунда вазирлик, қўмиталар, агентликлар ва инспекциялар ҳамда уларнинг ҳудудий ҳамда туман (шаҳар) бўлинмаларининг жами бошқарув ходимлари чекланган сони 46 989 та этиб белгиланади.

Камбағалликни қисқартириш ва бандлик вазирлиги касаба уюшмалари билан бирга штат бирликлари қисқартирилган ходимларни иш билан таъминлашга кўмаклашади.

Аввалроқ Туман ва шаҳар ҳокимликлари фаолиятини такомиллаштиришга доир президент фармони ишлаб чиқилганди. Ҳужжатда ушбу тузилмаларда ҳоким ўринбосарлари сонини 4 нафар этиб белгилаш таклиф қилинган. Ҳозирда ҳар бир ҳокимнинг 6 нафардан ўринбосари бор.