Ўзбекистонда чет эл фуқаролари учун махсус солиқ режими жорий этилади. Бу ҳақда Ўзбекистон Республикаси Президентининг 4 октябрдаги фармони [ПФ-180-сон]га таяниб Адлия вазирлигининг Ҳуқуқий ахборот телеграм канали маълум қилди.

Унга кўра, 2026 йил 1 январдан қуйидаги шартларга жавоб берадиган чет эл фуқароларининг Ўзбекистон ҳудудидан ташқаридаги манбалардан олинган даромадларини жисмоний шахслардан олинадиган даромад солиғидан озод қилишни назарда тутувчи чет эл фуқароларининг даромадларини солиққа тортишнинг махсус солиқ режими жорий этилади:

• 50 минг АҚШ доллари миқдорида махсус йиғим тўлаш;
• Ўзбекистондаги махсус ваколатли тижорат банкида банк ҳисобварағини ёки махсус ваколатли крипто-биржада крипто-ҳамён очиш.

Кетма-кет 12 ойлик давр давомида жами 30 календарь кундан кўпроқ Ўзбекистон Республикасида ҳақиқатда бўлган жисмоний шахслар улар мулк ёки ижара ҳуқуқи асосида Ўзбекистон Республикаси ҳудудида турар жой кўчмас мулк объектига эга бўлганда Ўзбекистон Республикасининг солиқ резидентлари деб эътироф этилади.