Фабио Каннаваро Ўзбекистон миллий терма жамоасига бош мураббий этиб тайинланди.

«Ўзбекистон футбол ассоциацияси 3 карра Жаҳон чемпионати иштирокчиси, 2006-йилги Жаҳон чемпионати ғолиби, яқин ўтмишнинг энг яхши ҳимоячиларидан бири, таниқли мутахассис — Фабио Каннаваро билан шартнома тузди. Италиялик мураббий жамоамизни АҚШ, Канада ва Мексика майдонларида ўтадиган Жаҳон чемпионатига тайёрлайди», дея хабар берди УФА.

Маълум бўлишича, мураббийлар штабида Каннаварога қуйидаги мутахассислар ёрдам беради:

▪️ Аужениё Албарелла — ёрдамчи мураббий (Япония терма жамоаси, «Ювентус», «Удинезе» ва «Динамо Загреб»да ишлаган);

▪️ Троизе Франсеско — жисмоний тайёргарлик бўйича мураббий («Беневенто», «Удинезе» ва «Динамо Загреб»да фаолият юритган);

▪️ Антонио Кименти — дарвозабонлар мураббийи (Италия ёшлар терма жамоаси, «Сампдориа» ва «Спал» клубларида ишлаган).

Хабарларга кўра, Каннаваро билан 2+3 кўринишида шартнома тузилган. Терма жамоанинг собиқ бош мураббийи Тимур Кападзе эса Жаҳон чемпионатида Каннаварога ёрдамчи бўлади.