Профилактик ишлар якунланиб, яқин муддат ичида Тошкент метросининг “Ўзбекистон мустақиллигининг 30 йиллиги” йўналиши ўз фаолиятини қайта тиклайди, деб хабар берди метрополитен матбуот хизмати.

Бутун йўналиш тахминан 2 ой, айрим бекатлар 3 ойдан ортиқ вақт фаолият кўрсатмади.

Метрополитен хабарида айтилишича, поездлар ҳаракати ва йўловчилар хавфсизлигини таъминлаш ҳамда сифатли хизмат кўрсатиш мақсадида ушбу йўналишда поездлар ҳаракати синов тариқасида (йўловчиларсиз) бир муддат ҳаракатланади.

Синов жараёнлари муваффақиятли ўтиб, ижобий хулоса қайд қилинганидан сўнг, “Ўзбекистон мустақиллигининг 30 йиллиги ерусти ҳалқа йўли” йўналиши тахминан жорий йилнинг 18 октябрь санасидан одатдаги тартибда йўловчиларга хизмат кўрсатишни бошлайди.