АҚШ президентининг глобал шериклар бўйича махсус вакили Паоло Замполли АҚШ давлат котиби Марко Рубио Ўзбекистонга ташриф буюришини, шунингдек, президент Доналд Трампнинг ташриф буюриши керак бўлган рўйхатда Ўзбекистон ҳам борлигини билдирди. Бу ҳақда у журналист ва телебошловчи Жаҳонгир Олимовга берган интервьюсида маълум қилган.

“Президентингиз билан ҳар бир учрашувда таассуротим ортади. Бугун бутун маъмуриятимиз, Оқ уйдаги ҳамкасбларим ва Рубио хонимнинг қўллаб-қувватлаши мени жуда хурсанд қилди. Рубио хонимнинг кутилмаган ташрифи ажойиб бўлди. Биз у билан АҚШ давлат котибининг яқинда Ўзбекистонга ташриф буюриши мумкинлигини муҳокама қилдик. Боэинг битими каби катта шартномалар имзоландики, мен бу устида кўп ишлаганман. Энди ўзимни мамлакатингиз дўсти деб биламан. Мени энди мамлакатингизда тез-тез кўрасиз”, дейди Замполли.

​АҚШ президентининг махсус вакилининг айтишича, икки давлат ўртасидаги ҳамкорлик янги босқичга кўтарилган.

“Жуда узоқ муддатли ҳамкорликда бутунлай янги босқич бошланаётганини ҳис қиляпман. Ўзбекистон ва АҚШ ўртасидаги ҳамкорлик, шубҳасиз, жуда мустаҳкам, узоқ муддатли шериклик бўлади. Президент бугун эълон қилган ва имзоланган миллиардлаб долларлик битимлар, шунингдек, Боэинг шартномаси жуда ажойиб. Бу ҳали бошланиши холос”, дейди АҚШ президентининг махсус вакили.

​Замполли “Доналд Трамп Ўзбекистонга ташриф буюрадими?” деган саволга Оқ уй раҳбарининг ташриф буюриши керак бўлган рўйхатда борлигини маълум қилган.

“Тез орада деб умид қиламан. Биз ундан сўраб келмоқдамиз. Унинг иш жадвали жуда тиғиз, лекин шунга қарамай Ўзбекистон у ташриф буюриши керак бўлган давлатлар рўйхатида бор. Мен шахсан Президентдан илтимос қилдим”, дейди Паоло Замполли.