Маълумки, эпидимологик вазият туфайли мамлакатимиздаги профессионал таълим муассасалари, академик лицей ҳамда умумтаълим мактаблари учун қишки таътил муддати 2022 йил 24 январга қадар узайтирилди. Шу муносабат билан таълим масканлари томонидан таътилни мазмунли ўтказиш бўйича муайян чоралар кўрилмоқда.

Хусусан, Ўзбекистон давлат хореография академияси раҳбарияти ҳам талабаларни таътил даврида вақтини мазмунли ўтказиш учун онлайн тадбирларни йўлга қўйди. "Санъат назарияси ва тарихи" кафедраси қошидаги "Ёш санъатшунос" тўгараги ташаббуси билан интеллектуал викторина ўтказилди. Унда ЎзДХА ва академия Урганч филиалининг талабалари иштирок этиб, кафедранинг профессор-ўқитувчилари томонидан берилган саволларга жавоб беришди.

Викторинада  Президентнинг соҳага оид қарор ва фармонлари, ўзбек миллий рақс санъати асосчилари, илк ўзбек балети, ўзбек композиторлари, раққос, раққосалар ҳаёт ва ижодига оид саволлар берилди. Энг кўп тўғри жавоблар йўллаб, фаол иштирок этган талабалар пул мукофоти билар тақдирланди.

– Таътилнинг асосий қисми ўтиб, дарс жараёнига киришиш палласида таътил яна узайтирилиши бироз кўнглимизни чўктирган бўлса, турли викториналар ва маҳорат дарслари бизни тезда билимларни мустаҳкамлашга чорлади, – дейди "Санъатшунослик" таълим йўналиши 2 курс талабаси, викторина ғолиби Зоир Ўроқов. – Бу каби интеллектуал викториналар, онлайн дарслар бизнинг билимларимизни синовдан ўтказади ва тезкорликка чорлайди.