Ижтимоий ҳимояни ривожлантириш институти Ўзбекистонда тарбия жараёнида болаларга нисбатан қўлланиладиган зўравонликка таъсир қилувчи омиллар таҳлилини тақдим қилди.

Ушбу таҳлилни тайёрлаш учун респондентлар иштирокида сўровнома ўтказилган ва қатнашчилардан оилада боланинг хулқини тўғрилаш учун қандай хатти-ҳаракатлар қилиши сўралган. Ушбу хатти ҳаракатларга асосланиб, оилада катталар томонидан болаларга қилиниши мумкин бўлган зўравонликлар баҳоланган.

Натижаларига кўра, кўпчилик ота-оналар тўғри хулқ атворни шакллантириш, бирор номақбул хатти-ҳаракатнинг нима сабабдан ёмонлигини тушунтириш ёки бажариш учун болага бошқа топшириқ беришларини таъкидлаган.

Мазкур жараёнда психологик агрессия турлари жисмоний жазодан кўра анча кенг тарқалганини кўриш мумкин. Айниқса, бақириш жуда оммабоп жазолаш тури бўлиб, ота-оналарнинг қарийб ярми бу жазо туридан фойдаланишини маълум қилган.

Оғир жисмоний жазолаш турлари (қулоғига, кетига уриш, камар билан уриш) нисбатан енгилроқ жисмоний жазолаш турларига нисбатан камроқ қўлланган.

Жисмоний жазо турларидан энг кенг тарқалган усуллар бу боланинг оёғига уриш ҳамда силкитиш ҳисобланади. Жазолаш турларини ёш ва жинс бўйича тақсимотига қаралса, 5-14 ёшли болалар ва, айниқса, ўғил болалар кўпроқ жазоланишини кўриш мумкин.