Кеча, 29 апрель куни бўлиб ўтган Олий Мажлис Қонунчилик палатасининг ялпи мажлисида ЎзЛиДеП фракцияси депутатлари ишлаб чиққан — «Меҳнат кодексига хусусий сектор учун белгиланган ижтимоий мажбуриятларни эркинлаштиришга қаратилган ўзгартириш ва қўшимчалар киритиш тўғрисида»ги қонун лойиҳаси биринчи ўқишда концептуал жиҳатдан кўриб чиқилди.

Хабарга кўра, ташаббускор тараф меҳнат қонунчилигида хусусий сектор учун ижтимоий мажбуриятлар кўплиги, соҳадаги ҳуқуқий механизмларни қайта кўриб чиқиш заруриятини юзага келтираётганини таъкидлаган.

Қонунчилик палатаси хабарига кўра, амалдаги Меҳнат кодексида давлат ва хусусий секторда иш берувчилар учун бир хилдаги ижтимоий мажбуриятларнинг назарда тутилиши хусусий сектор, айниқса, кичик тадбиркорлик субъектларининг молиявий барқарорлигига сезиларли даражада таъсир кўрсатмоқда. Бу эса хусусий секторда ходимларни ишга қабул қилиш ва ишдан бўшатиш жараёнларининг расмий қайд этилмаслигига олиб келмоқда.

Қонун лойиҳаси палата сайтида тўлиқ эълон қилинмаган.

Маълум бўлишича, лойиҳада Меҳнат кодексига қуйидаги ўзгартириш ва қўшимчалар киритиш назарда тутилган:

▪️ меҳнат шартномасини ходимнинг ташаббуси билан бекор қилишда аризани чақириб олиш жараёнида иш берувчининг иштирокини таъминлаш орқали томонларнинг масъулиятини ошириш;

▪️ меҳнат шартномасини иш берувчи ташаббусига кўра бекор қилишда касаба уюшмаси қўмитаси ёки маҳаллий меҳнат органи билан келишиш жараёнларини соддалаштириш орқали хабардор қилиш тартибига ўтказиш;

▪️ ходимнинг узоқ муддат меҳнатга қобилиятсиз бўлиши натижасида меҳнат шартномасини бекор қилиш асосларини такомиллаштириш;

▪️ тадбиркорлик субъектларида ўриндошлик асосида фаолият юритаётган ходим билан меҳнат шартномаси бекор қилинганда огоҳлантириш муддати ва компенсация тўловларини бекор қилиш.

Кодексга киритилиши кутилган мазкур ўзгаришлар қизғин муҳокама ва баҳсларга сабаб бўлган ва якунда етарли овоз тўплай олмаган.

Қонун лойиҳасини асосан ташаббускор томон – ЎзЛиДеП депутатлари деярли тўлиқ қўллаб-қувватлаган – 57 та тарафдор, 1 та овоз бермаган.

Қолган 4 тала партиянинг бирорта депутати лойиҳанинг тарафини олмаган. 4 та партиядан жами 71 нафар депутат қарши овоз берган. Миллий тикланишдан 2 нафар депутат бетараф қолган.

Биринчи ўқишда етарли овоз ололмаган қонун лойиҳаси ташаббускор партияга қайтарилган.

«Миллий тикланиш» партияси ўз Telegram саҳифасида нима учун қонун лойиҳасини рад этганига изоҳ берди:

«Қонун лойиҳасида асосан ходим эмас, иш берувчи – тадбиркорлар манфаатига устуворлик берилган. Яъни, тенглик бузиляпти. Фракция либералларнинг тадбиркорларни ривожлантириш ғояларига қарши эмас, лекин ҳар қандай ривожланиш қадриятлар билан бўлиши керак!»

Олдинроқ сенатор Азамат Зиё «Ўзбекистон Республикасининг айрим қонун ҳужжатларига ўзгартириш ва қўшимчалар киритиш тўғрисида»ги қонун муҳокамасида норманинг рус тилидаги матнига эътироз билдирган эди.