Европа кенгаши Президенти Антониу Кошта бугун тонгда Самарқанд шаҳрида бўлиб ўтадиган «Марказий Осиё – Европа Иттифоқи» биринчи саммитида иштирок этиш учун Ўзбекистонга ташриф буюрди. Бу ҳақда «Дунё» АА хабар берди.

«Олий мартабали меҳмонни Самарқанд халқаро аэропортида Ўзбекистон Бош вазири Абдулла Арипов ва бошқа расмийлар кутиб олди, – деб ёзади Ўзбекистон Республикаси Бош вазирининг Матбуот котиби Бекзод Ҳидоятов ўзининг телеграм-каналида.

Қайд этилишича, қисқа суҳбатдан сўнг, Европа кенгаши Президенти ташриф дастурига мувофиқ навбатдаги манзилга жўнаб кетган.

3-4 апрель кунлари Ўзбекистон Президенти Шавкат Мирзиёев раислигида ўтадиган саммит ишида Европа кенгаши Президенти Антониу Кошта, Европа комиссияси Президенти Урсула фон дер Ляен, Қозоғистон Президенти Қасим-Жомарт Тоқаев, Қирғизистон Президенти Садир Жапаров, Тожикистон Президенти Эмомали Раҳмон ва Туркманистон Президенти Сердар Бердимуҳамедов иштирок этади.