Тошкент шаҳрининг Ҳилтон меҳмонхонасида 29 декабрь куни Uzbekistan Sport Awards–2021 маросими бўлиб ўтди. Унда турли номинациялар бўйича 2021 йилнинг энг яхшилари аниқланди.

Мухлислар талқинига кўра, боксчи Баҳодир Жалолов йилнинг энг яхши спортчиси деб топилди. Жалолов 2021 йилда Токио Олимпия ўйинларида ғолибликни қўлга киритганди.

Республика Комиссияси хулосасига кўра, «Йилнинг энг яхши спортчиси» номинациясига Ўзбекистон Миллий кубоги ғолиби, оғир атлетика бўйича Олимпия ўйинлари ва жаҳон чемпиони Акбар Жўраев лойиқ кўрилди.

Йил кашфиёти соврини эса таэквондо бўйича Олимпия ўйинлари ғолиби Улуғбек Рашидовга насиб этди.

Бундан ташқари, маросим давомида қуйидаги номинациялар бўйича ғолиблар аниқланди:

Йилнинг энг яхши мураббийи – Токио—2020 Олимпия ўйинлари чемпиони Улуғбек Рашидовнинг мураббийи Хан Павел;

Йилнинг энг яхши ёш спортчиси – бокс бўйича ўсмирлар ўртасида жаҳон чемпиони Нигина Ўктамова;

Йилнинг энг яхши ёш спортчиси – эркин кураш бўйича ўсмирлар ўртасида жаҳон чемпиони Камронбек Кадамов;

Спорт соҳасидаги халқаро ҳамкорликни кучайтиришга қўшган ҳиссаси учун – Осиё Олимпия Кенгаши вице-президенти Отабек Умаров;

Йилнинг энг матонатли эркак спортчиси – параенгил атлетика бўйича Токио—2020 Паралимпия ўйинлари ғолиби Элбек Султонов;

Йилнинг энг матонатли аёл спортчиси – параенгил атлетика бўйича Токио—2020 Паралимпия ўйинлари ғолиби Нурхон Қурбонова;

Йилнинг энг яхши пара спорт мураббийи – параенгил атлетика бўйича мураббий Сардор Абдухолиқов;

Йилнинг энг яхши ёш матонатли спортчиси – пара енгил атлетика бўйича Токио—2020 Паралимпия ўйинлари ғолиби Бобуржон Омонов;

Йилнинг энг яхши ёш матонатли спортчиси – пара енгил атлетика бўйича Токио—2020 Паралимпия ўйинлари ғолиби Асила Мирзаёрова;

Спорт соҳасидаги кўп йиллик хизмати учун – Ўзбекистон спорт фахрийлари кенгаши раиси Баҳодир Махситов;

Йилнинг энг фаол оммавий спорт тарғиботчиси – Мудофаа вазирлиги спорт маркази;

Йилнинг энг фаол спорт журналисти – «Спорт ТВ» телеканали журналисти Шафоат Толибжонова;

Йилнинг энг фаол спорт фото мухбири – Ўзбекистон Миллий ахборот агентлиги ва «Olamsport.com» сайти фото мухбири Алмурат Мамадаминов;

Йилнинг энг томошабоб спорт тадбирлари ташкилотчиси – Ўзбекистон аралаш жанг санъатлари (MMA) ассоциацияси;

Йилнинг энг фаол спорт мухлиси – Абдураҳмон Фозилов;

Спорт йўналиши бўйича йилнинг энг фаол матбуот хизмати – Ўзбекистон футбол ассоциацияси;

Йилнинг энг фаол спорт сайти – «Sports.uz» сайти;

Йилнинг энг яхши спорт шифокори – Республика спорт тиббиёти илмий амалий маркази бош шифокори Дилшодбек Маҳмудов;

Йилнинг энг фаол спорт блогери – инстаблогер, «MY5» телеканали ходими Ҳилола Исоқова;

Йилнинг энг яхши спорт терма жамоаси – оғир атлетика бўйича Ўзбекистон терма жамоаси;

Йилнинг энг фаол спорт мактаби – Бухоро тумани болалар-ўсмирлар спорт мактаби;

Йилнинг энг ҳалол ҳаками – дзюдо бўйича халқаро тоифадаги ҳакам Рамзиддин Саидов;

Йилнинг энг яхши спорт федерацияси – Ўзбекистон камондан отиш федерацияси;

Йилнинг энг интилувчан федерацияси – Ўзбекистон ўқ отиш федерацияси.