Қирғизистон Жўқорғи кенгесининг навбатдаги йиғилишида депутатлар фамилияларнинг янги шакли бўйича қонун лойиҳасини тасдиқлади. Унда миллий анъаналар ва тарих акс этади. Бу ҳақда 24.кг хабар берди.

Қонун лойиҳасининг муаллифларидан бири, депутат Мирлан Самийкожо аниқлик киритишича, ҳужжат фуқароларда русча қўшимчаси бўлмаган фамилия танлаш имкони бўлиши учун ишлаб чиқилган. Қайд этиш жоизки, фамилияларнинг жорий шакли ҳам сақланиб қолади, -ов, -ев, -вич, -вна қўшимчаларини фақат фуқароларнинг хоҳишига кўра ўзгартириш мумкин.

Қирғизистон республикаси Оила кодекси, “Фуқаролик ҳолати гувоҳномалари” қонунига ўзгартириш тўғрисидаги қонун лойиҳаси 1-моддага қўшимчалар киритишни назарда тутади. Унга кўра, ўғил болалар учун отасининг исми ёнига “уулу” (ўғли), “дин/тин”, “дун/тун”, қиз фарзандлар учун эса “кызы”, “дан/тан” ёки “ден/тен” қўшилиб, ушбу ҳолатда фарзандга отасининг (отчество) исми тайинланмайди.

Масалан, Бактибеков Усон Жакшиликович таклиф этилаётган ўзгартиришга кўра, Бактибеков теги Усон, Бактибектеги Усон Жакшиликтин, Бактибек Усон ёки Бактибек Усон Жакшилик уулу каби ўзгаради.

Бактибекова Нургул Жакшиликовна эса Бактибектеги Нургул, Бактибектеги Нургул Жакшиликтан, Бактибек Нургул, Бактибек Нургул Жакшилик кизи шаклида ифодаланади.
 

Аввалроқ Қирғизистон Парламенти спикери фамилиясини ўзгартиргани ҳақида хабар берилган эди.