Ўзбекистонлик Нодирбек Абдусатторов Польша пойтахти Варшава шаҳрида бўлиб ўтган жаҳон чемпионатида шахматнинг рапид йўналиши (тезкор шахмат)да жаҳон чемпионига айланди.

17 ёшли шахматчи Нодирбек дастлаб амалдаги жаҳон чемпиони Магнус Карлсенни мағлубиятга учратиб, биринчи ўринга кўтарилиб олди. Шундан сўнг у Владимир Федосеев, Гукеш Доммаражу, Ян-Кшиштоф Дуда каби шахматчиларга қарши драматик баҳсларда дуранг қайд этди.

13 та партия ҳисобига Абдусатторов, Ян Непомняший, Магнус Карлсен ва Фабиано Каруана 9,5 очко тўплади. 

Қўшимча натижаларга кўра, ғолиблик Абдусатторов ва россиялик Непомняший ўртасидаги тай-брекда аниқланди. Дастлабки партияда дуранг қайд этган Нодирбек кейинги партияда ғалаба қозониб (1,5-0,5), жаҳон чемпионига айланди.

Президент матбуот котиби Шерзод Асадовнинг маълум қилишича, МДҲнинг норасмий саммити бўлиб ўтган Санкт-Петербургдан Тошкентга қайтаётган самолётда Президентимиз ва бутун делегация тезкор шахмат бўйича жаҳон чемпионатида ҳамюртимиз Нодирбек Абдусатторовнинг иштирокини катта қизиқиш билан онлайн кузатиб борган.

Шавкат Мирзиёв шахматнинг рапид йўналиши бўйича янги ва энг ёш жаҳон чемпионига ўзининг энг самимий табрикларини йўллаган ҳамда унинг ота-онаси ва мураббийларига миннатдорлик билдирган.