Бугун, 5 декабрь куни Ижтимоий-маънавий тадқиқотлар институтида «Бахтимиз қомусининг моҳияти» номли 5 рисоладан иборат туркум китоблар тақдимоти бўлиб ўтди.

Республика Маънавият ва маърифат маркази мутасаддилари, институт ходимлари, профессор-ўқитувчилар, давлат ва жамоат ташкилотлари вакиллари қатнашган тақдимотда сўзга чиққанлар мазкур рисолаларнинг Ўзбекистон Республикаси Давлат Конституциясининг 32 йиллигига муносиб туҳфа бўлиши билан бирга бош қомусимиз моҳиятини фуқароларга тушунтириш бўйича жуда зарурий қўлланма бўлганини эътироф этди.

Қўлланмалар институт томонидан тайёрланиб, нашр этилган бўлиб, уларда Ўзбекистон Республикаси Конституцияси моддалари шарҳлаб берилган.

Туркумнинг биринчи рисоласи «Ўзбекистон Республикаси Конституцияси: асосий принциплар» деб номланади. Унда қомусимизнинг миллий илдизлари, Конституция муқаддимаси ва биринчи бўлимига кирган масалалар, жумладан, конституциявий тузум йўналишлари ва белгиларининг мазмуни, давлат суверенитети, халқ ҳокимиятчилиги, Конституция ва қонунларнинг устунлиги ва ташқи сиёсат масалалари шарҳланган.

Конституциямизнинг «Инсон ва фуқаронинг асосий ҳуқуқлари, эркинликлари ва бурчлари» деб номланган иккинчи бўлими ҳақида иккинчи рисолада фикр юритилган бўлса, учинчи рисолада («Жамият ва шахс») жамиятнинг иқтисодий негизлари, фуқаролик жамияти институтлари, оила, болалар ва ёшлар ҳамда оммавий ахборот воситалари билан боғлиқ масалалари шарҳланган.

Тўртинчи рисола «Ўзбекистон Республикасининг маъмурий-ҳудудий ва давлат тузилиши» деб номланган ва унда Конституциямизнинг тўртинчи бўлимига кирган масалалар, жумладан, Ўзбекистон Республикасининг маъмурий-ҳудудий тузилиши ҳамда Қорақалпоғистон Республикаси ташкил топганлигини, унинг асослари масалалари ҳақида сўз боради.

«Давлат ҳокимиятининг ташкил этилиши» деб номланган бешинчи рисолада эса давлат ҳокимияти тузилмаси, унинг ташкил этилиши масалаларига шарҳ берилган.